Diyarname

Bi pêşengiya Komeliya Nivîskarên Kurd, Pena Kurd û Hevgirtina Rewşenbîrên Rojava ya Bakur nivîskarên kurd ji bo piştgiriya Kobanî komek nivîskar çûr ser sînorê Kobanî.

Nivîskar ji bo şermezarkirina çeteyên DAIŞ'ê û piştgiriya Kobanî 15'ê mehê saet 09.00'an de ji ber Konukeviya Amedê bi rê ketin. Nivîskar çûn konê berxwedanê ku li gundê Zarêta ya navçeya Bêrecûka Rihayê hatiye vedan.

Nivîskaran li cihê ku kon hatiye vedan rastî eleqeyek mezin hatin û hemwelatiyan bi çepikên xwe kêfxweşiya xwe nîşan dan. Li ser navê nivîskaran Osman Ozçelîk axivî û got ku bi hezar sal in li hember kurdan êrîş pêk tên û niha jî ev êrîş bi destê çeteyên DAÎŞ'ê pêk tê. Ozçelîk, destnîşan kir ku çeteyên ku ji deverên cuda hatine dixwazin kurdan qetil bikin û pergala xwe ya qirêj ava bikin û got ku li hemberî van êrîşan hemû cihan jî bêdeng dimîne.

Nivîskar Osman Ozçelîk, da zanîn ku parçeyek Kurdistanê bi serê xwe nikare rizgariya xwe pêk bîne û wiha  dom kir: "Ji ber vê jî divê Kongraya Neteweyî ya Kurd di demek kurt de li hev bicive. Divê bi taybetî başûrê Kurdistanê jî dengê xwe bilind bike û piştgirî bide vê berxwedanê." Ozçelîk, anî ziman ku hemû kurd divê berê xwe bidin Kobanê û wiha dawî li axaftina xwe anî: "Em silavên xwe ji şervanên YPG'ê re bi rê dikin û dibêjin ku heke hewce be li gel wan emê jî şer bikin."

Hevserokê Komeleya Nivîskarên Kurd Mehmet Yilmaz jî da zanîn ku di rojên qehremantiyê de li Rojava şervanên YPG'ê wekî qehremanan şer dikin û wiha got: "Divê ev qehreman baş bizanibin qehremaniya wan nayê jibîrkirin û di dîrokê de jî dê bê nivîsandin."

Yilmaz, di dawiya axaftiana xwe de jî anî ziman ku êdî şer hatiye asteke wisa ku li hemberî vê êrîşê bêdengmayîn nabe û got ku roj ew roj e ku di hemû mewziyan de bê şerkirin.