NAVENDA NÛÇEYAN

Serokê Desteya Giştî ya Buroya Siyasî ya Yekîtî Niştimanî Kurdistan (YNK) Mela Bextiyar piştgiriya şoreşa rojavayê Kurdistanê kir û silav li Yekîneyên Parastina Gel (YPG) jî kir

Bextyar duh li bajarê Silêmaniyê di 7'emîn Festîvala Gelawêj a Çandî ku gelek rewşenbîrên kurd, ereb, fars û fransiz jî beşdar bûn de axivî û silavên xwe pêşkêşi YPG'ê yên li dijî El-Nusra şer dikin kir. Bextiyar diyar kir ku ew piştgiriya şoreşa rojvayê Kurdistanê dikin.

Mela Bextiyar derbarê şoreşa Rojava de wisa axivî: "Xewnên me, têkoşîn, helwest û hestên me bi têkoşîna rizgarî û demokratîk û netewî a rojavayê Kuristanê re ne, em ji kûraniya dilê xwe serkeftinê ji bo wan dixwazin."

Mela Bextiyar silav li YPG'ê jî kir û got: "Ji vir, ji vê holê ez silavên xwe ji wan lehengan re dişînim, ew lehengên ku li dijî pîrçemokên tariyê yên El-Nusra şer dikin." 

Bextiyar diyar kir ku YPG ji bo Kurdistanê şer dike û wiha dewam kir: "Ev lehengiyeke mezin e, em qebûl bikin an nekin, ev li gorî îdeolojiya me be an na, rexneyên me derbarê wan rast bin yan şaş bin jî, tenê rastiyek heye pêwîste em hemû zanibin, ev rastî ew e ku ew pêşmerge ne û Kurdistanê diparêzin da ku careke din neyê dagîr kirin, ev jî tiştekî pir girîng e."