Amed
Îro li Amedê mîtîngek di bin navê "Bila Girtîgeha 5 Nimre ya Amedê Bibe Muzeya Mafên Mirovan" hate li dar xistin.

Mîtîn ji aliyê Hewldana 78'iyan ve hate li dar xistin. BDP, Hak-Par, KADEP, DDKD, ESP jî têde gelek saziyên sivîl piştgirî da mîtîngê û lê amade bûn.

Vaye ji axaftinên ku li mîtîngê hatin kirin çend gotin:

- Serokê Komeleya 78'iyan ê Amedê Gani Alkan:
Zindana Amedê ya 5 Nimre laboratuara mirovan bû. Di vê laboratuarê de şexsiyet û nirxê mirovan dihat guhartin. Armanc ev bû. Li Zindana Amedê xwestin em zimanê xwe jî ji bir bikin. Lê denizanîn ku zimanê me pêşeroja me ye. Emê Girtîgeha Amedê bikin muzeya mafên mirovan, bila vê baş bizanin.

- Berdevkê 78'iyan Celalettin Can:
Ji ber wehşeta li zindana Amedê divê dewlet ji girtiyan û ji gel lêborînê bixwaze.
Tê zanîn di dema referandûmê de Hikumeta AKP'ê û Serokwezîr birêz Erdogan got 'Em girtîgeha Amedê xira bikin, tiştên bûyî em ji bîr bikin'. Ez dipirsim em ji bîr bikin? Ev têrê nedikir dîsa heman Serokwezîr diBêje 'Em wir bikin dibistan'. Yanê dewleta ku di sala 1984'an de bi wehşeteke mezin xwest mirovên herî egîd ên gelê kurd bikin tirk, ew der kirin dibistaneke wehşetê û niha hikumet heman polîtîkayê didomîne. Çi guherî? Ev jî têr nekir, wezîrek wisa got: 'Ger em dikin dibistan, em navendeke dan û standinê jî li wir saz bikin'. Yanê ri hucreyên Mazlûm Doganan, Kemal Pîran, Hayrî Durmuşan re rê amûrên kapîtalîzmê bêne firotin. Ma gelê kurd destûrê dide vê yekê?Na. Kurd yek ji gelên herî baş ên dinyayê ne. Kurd gelekî bi rûmet e. Kurd dê xwedî li Doganan, Pîran derkeve û nehêle girtîgehê xira bikin.

- Hevserokê KCD'ê Ahmet Turk:
Serokwezîr Erdogan dibêje em dijî 'cudaxwaziyê ne'. Tu ziman, nasname, hêza siyasî, daxwaza statuya siyasî ya gelekî red dikî. Ka kî cudaxwaz e? Tu cudaxwazî dikî, tu parçe dikî, yê înkar dike tu yî. Erdogan dibêje ezê bi neviyên Selahaddin Eyyûbî, Ehmedê Xanî, Feqiyê Teyran, Melayê Cizîrê ne aştiyê saz bikim. Baş e lê em kî ne? Em xwedî mîrateya Selahedîn Eyûbî, Ehmedê Xanî, Feqiyê Teyran, Melayê Cizîrî ne. Ger Selahedîn Eyûbî bidîta zimanê gelê wî hatiye qedexekirin dê tofan rakira. Es bawerim bi van gotinên Erdogan niha Eyûbî, Ehmedî Xanî, Feqiyê Teyran, Melayê Cizîrî li goran xwe diêşin.
- Xwezî zimanê van dîwarên bi xwîn heba û biaxiviyana..