Diyarname
Egîtîm-Sena Wanê îsal 2'yemîn Sempozyûma Zimanê Kurdî li dar dixe ku îsal bi sernavê "Sosyo-Polîtîkaya Ziman" li dar dikeve. Endamê komîteya amadekar Lokman Babat bo me got, "Em wekî Egîtîm Senê her sal sempozyûmek li ser zimanê kurdî dardixin û dixwazin xizmetek ji bo ziman bikin."
BEŞDARÊN SEMPOZYÛMÊ
Sempozyum wê rojên 17 û 18'ê vê mehê li Wanê li dar bikeve. Gelek kesên her yek di warê xwe de pispor dê wekî axifger beşdar bibin û gotarên xwe pêşkêş bikin. Edîtorê Diyarnameyê Cemil Oguz jî wekî axifger dê beşdar bibe û bi sernavê "Ji aliyê zimanî ve erênî û neyîniyên çapemeniya kurdan" gotara xwe pêşkêş bike.
Anne Marja Guttorm Graven, Şerefxan Cizîrî, Cemil Oguz, Lal Laleş, Adar Jiyan, Dr. Kazhal Fedakar, Îsmet Xabûr, Dr Eyad Xankî, Dr Dilawer Zeraq, Cemile Turhalli wekî axifger dê beşdarî sempozyûnê bibin û biaxivin.
'EM TÊKOŞÎNA MAFÊ ZIMANÊ DAYIKÊ DIDIN'
Li ser amadekirin û armanca sempozyûmê me bi endamê komîteya amadekar Lokman Babat re xeber da. Babat dibêje, "Li hemberî asîmîlasyonê em wekî Egîtîm-Senê têkoşîna mafê zimanê dayikê didin" û wiha didomîne, "Egîtîm-Sen mafê perwerdehiya zimanê dayikê wekî mafek bingehîn dibîne û vê jî di rêziknameya xwe de diparêze. Pergala perwerdehiyê fermî ya Tirkîyê neteweyên ne tirk nabîne û wan tune hesab dike. Ev jî dibe sedema asîmîlasyonê."
'ZIMAN BO ME NIRXA MEZIN E'
Babat diyar dike ku kurd li hemberî polîtîkayên asîmîlasyonê wekî neteweyekî bi rûmet li nirxên xwe xwedî derdikeve û van lê zede dike, "Nirxên herî mezin yek jê ziman e û em wekî Egîtîm-Sen Şaxa Wanê li vê nirxê kurdan xwe derdikeve. Armanceke din a sempozyuma me jî kêmasiya xebatên li ser zimanê kurdî ye ku vê temam bike. Gelek kes, sazî weşanxane û hwd. li ser ziman xebatan dikin lê wextê saziyek hevpar ya ziman tune be hemû xebat jî ji xwe re rêyek dibinin û standardek ya zimanê kurdî çênabe. Em jî wekî Egîtîm Senê her sal sempozyûmek li ser zimanê kurdî dardixin û dixwazin xizmetek ji bo ziman bikin."
Lokman Babat: "Nirxên herî mezin yek jê ziman e û em wekî Egîtîm-Sen Şaxa Wanê li vê nirxê kurdan xwe derdikeve."
Ji bo hemû bernameyê bitikînin:
- Sempozyûn, "Sosyo-Polîtîkaya Ziman"
**
Nûçeya Eleqedar:
- 'Sosyo-Polîtîkaya Ziman' wê bê nîqaşkirin