Serê sibê kayûm şandin ser Şaredariyên Mêrdîn, Batman û Xelfetî. Ji serê sibê de li van deran çalakî hene.
Kî çi got, me ew dan hev:
Bakirhan: Yên dest dirêjî me kirine, plana kayûman çêkirin
Hevserokên DEM Partî Tuncer Bakirhan û Tulay Hatimogullari çûn Batmanê. Li ber şaredarî sekinîn û daxuyanî da.
Bakirhan gotina Serokê MHP'ê Devlet Bahçeli ku dest dabûn wan bibîr xist û wisa got: "Van kêmîndanêran, dizan, yên plana tasfiyeyê kirine dest dirêjî me kirin. Me jî destê wan girt. Me got belkî muzakere bikin, gelê kurd ku bi salan e nikarîne têk bibin me got belkî aştiya bi rûmet çêbikin. Lê me dît ku ew tasfyeyê birêxistin dikin, plana da emê çawa kaYûman bişînin wir dikin. Dîsa plan dikin ku ka dê çawa gelê kurd înkar bikin dikin. Batman li hemberî kiryar nediyaran têk neçû. Ligel bi hezaran windayiyan jî xwedî li ziman, çand û vîna xwe derket. Em we hişyar dikin, dest ji vê dizî, destdana ser vîna gel berdin." 

Hatimogullari: Emê bi hev re xwedî li vîna xwe derên
Hevseroka DEM Partî Tulay Hatimogullari: "Hûn sed hezar kayûman bişînin jî vîna gel dê bi ser bikeve. Gelê kurd li hemberî vê derbeyê bi yek dengî li ser piyan e. Ligel gelên din ên li Tirkyeyê, ligel jinan emê dengê azadî û demokrasiyê bilind bikin. Vîna gel dê li van kuçeyan be. Emê bi hev re xwedî li vê vînê derkevin."

Turk: Em dengê xwe bilind bikin:
Hevşaredarê Bajarê Mezin ê Mêrdînê Ahmet Truk got ku li hemberî vê bêpiqûqî, rêveçûna antî demokratîk, li hemberî ev kirina dest datîne ser vîna gel em hemû dengê xwe bilind bikin. "Destjêberdan tune ye. Ji têkoşîna ji bo demkorasî, aştî û azadiyê em bi paş ve gav navêjin. Emê destûrê nedin dest bidin vîna gel. Bila ev wisa bê zanîn."

Bucak: Em dest ji têkoşîna xwe bernadin
Hevşaredara Bajarê Mezin a Amedê Serra Bucak û endamên meclisê çûn Mêdînê.
Bucak li ber şaredarî ligel Hevşaredar Turk û Devrim Demir daxuyanî da û got, ev kayûm bê hiqûqî ye. Bucak wisa got, "Yên bi rangeran tên, bi lez fotoyên xwe dixin malpera şaredarî divê şerm bikin. Em bi hêrs in, emê têkoşîna xwe bidomînin. Gelê Kurd her tim destê xwe dirêjî aştiyê kiriye û berdêla demokrasiyê û jiyana bi hev re ya hemû gelan daye. Hê hûn dixwazin hê em çi berdêlê bidin.
Em gere vê têkoşînê bilind bikin. Ligel hemû hêzên demokrasiyê gere em li gel hev bin. Ev 7 meh in em hatine hilbijartin, me dilê gel bi dest xist, ligel wan em meşiyan. Ji bo vî gelî xizmet nekiribûn, me xizmet kir. Wan şaredarî kiribû cihê rantxurî, yê me derdê me ne rant e, em xizmetî dikin. Hûn çima ew qas bêtehamul in? Ji ber ku rantê we hat birîn. Lê ev daxwaza azadiyê ya gelê me ji rantê we ji wêdetir e, wê rantê we binpê bike.

Ozel: Ezê ligel Ahmet Turk bim
Serokê Giştî yê CHP'ê Ozgur Ozel li ser kayûmê daxuyanî belav kir, Ahmet Turk wekî "kevokê aştiyê" bi nav kir û got, "Ji bo kemerê zêrîn li bejna wan be her tiştî dikin. Ev kemer di 31'ê adarê de ji det wan hat girtin. Êdî ne partiya yekemîn in. Karê wan ê dawî li hemberî vîna miletê çêkirina derbeyê ye. Pêşî dest danîn ser vîna Esenyurtê, niha bi Mêrdîn, Batman û Xelfetî didomînin. Bi rastî em li sînorê ku êdî mafê gotinê bi dawî bûye ne. Di demokrasiyan de divê gotin xilas nebe. Li hemberî vê desthilatdariya pozbilind ku guh nade dengê gel û muxatabên wê yên siyayî emê têkoşîna xwe bidomînin."

BAROYA RIHAYÊ: Ev biryar ne hiqûqî ye
Serokê BAroya Rihayê Abdullah Oncel li ser kayûman got; "Li gor xala 67'an a Zagona Bingehîn divê mafê hilbjartin û hilbijêrî neyê binpêkirin. Dibêjin ber 6 sal, 3 meh û 15 roj cezayê Şaredarê Xelfetî ew ji kar girtine, lê me mêze kir ev ceza hê li dadgeha bilind e, teqes nebûye. Ji ber teqez nebûye xala 'masûmbûnê' hatiye binpêkirin. Dîsa dosyaya 2020'î ku didome YSK hay ji vê hebû ilgel vê jî berendamtiya birêz Mehmet Karayilan erê kiriye. YSK'ê gotiye dikare bê hilbijartin. Ji ber van yekan divê dest ji vê meseleya kayûmê û bêhiqûqiyê berdin.
Oncel ji bo roja pêşiyên me jî got: "Roja şemiyê bi mazûvaniya TBB'ê (Yekîtiya Baroyên Tirkiyeyê) wê civîna serokên baroyên bajaran li dar bikeve. Li wir emê vê mijarê bixin rojeva yekem, nîqaş bikin û daxwaza belavkirina deklerasyoneke bikin."

Îmamoglu: Emê sibê wekî Yekîtiya Şaredariyan bicivin
Şaredarê Bajarê Mezin a Stenbolê Ekrem Îmamoglu di X'ê de got, "Desthilatdarî kontrola xwe winda kiriye, vir de wirde diheje. Ahmet Turkê ku hê hefteyek berê ilgel Cîgerê Serokomar di navbera malbatan de lihevhatin çêdikir, di hefteyek de çawa bû terorîst. Di demorasiyan de berdewamiya vîna gel xala bingehîn e. Ger yê hatiye hilbijartin ji kar bê dûrxistin jî ji nav Meclisê yek ji dêvla wî/ê ve tê hilbijartin. Rayeya hilbijartinê tenê di destê hilbijêr de ye û ev nakeve destê kesek din. Ji bo civîna Habîtatê ya NY'ê (Neteweyên YekBûyî) ez hatim Kahîreyê, êvarê ez vedigerim Tirkiyeyû sibê bi awayekî awarte emê Encumena Yekîtiya Şaredariyan a Tirkiyeyê bicivînin."

Îyî Partî: Em diji kayûmê ne
Berdevkê Serokê Koma Îyî Partî Turhan Çomez li ser kayûma daxuyanî da çapemeniyê û got, "Kayûm tê wateya destdanîna ser vîna milet û em wekî partî vê yekê rast nabînin."

***

Nûçeya Eleqedar:

- Dîsa derbe: Bi kayûman dest danin ser Şaredariyên Mêrdîn, Batman û Xelfetiyê