Ji ber ku agirê Newrozê dadane li Cindirêsê 4 kurd hatin kuştin.

Çavkaniyên xwecih dibêjin ku ji ber agirê Newrozê li ser banên xwe pêdixistin çeteyên Ehrar El Şerqiye gule li welatiyên Cindirêsê barandin. Di encamê de 4 kesan canê xwe ji dest dan.

Li ser vê yekê Hawar Newsê nûçeyeke belav kir. Li gorî çavkaniyan çeteyan rasterast gule li welatiyan berandine ku agirê Newrozê li ser banê mala xwe ya di kolana 16`an de dadan. Li gor çavkaniyan navên kesên hatine kuştin bi vî rengî ye: Ferhan Osman (43), Îsmaîl Osman (38), Mihemed Îsmaîl Osman (18) û Mihemed Osman (42).

Heman çavkaniyan da zanîn ku bi sedan şêniyên Efrînê li pêşiya Nexweşxaneya Leşkerî ya dewleta Tirk a li navçeya Cindirêsê kom bûne ji ber ku nexweşxane cenazeyan radest nake.