ROZE MIHEMED / SILÊMANÎ

Tevgera Goran, Komela Îslamî a Kurdistanê û Eniya Hevpeymanî ya ji bo Demokrasî û Dadperweriyê eniyeke hevpar ava kirin û ragihandin ku ji bo berfirehkirina vê eniyê wê serdana aliyên din yên siyasî yên Başûrê Kurdistanê bikin.

Berdevkê Tevgera Îslamî ya Kurdistanê Kamil Mihemed têkildarî hewldanên wan ên ji bo avakirina eniyeke hevpar a mûxalefetê axivî û diyar kir ku piştî Goran û Komel ji hikumetê vekişiyane wan biryar dane bi hev re eniyeke hevpar a muxalefetê ava bikin û got: “Piştî vekişîna Goran û Komel me projeya avakirina eniyeke hevpar eşkere kir. Em bi xwe di nava hikumetê de nebûn. Bi fermî em muxalefet bûn. Baweriya me bi vê hikumetê nedihat. Rexneyên me li ser hikumetê hebûn. Me di warê pratîkî de jî hewldaneke di vê çarçoveyê de da. Ji lewma me serdana Komela Îslamî ya Kurdistanê û Tevgera Goran kiriye ji bo vê mijarê. Me projeya xwe li gel wan nîqaş kir. Wan jî gotin ku ewê li gel partî, aliyên siyasî û rêxistinan hêzeke hevpar rêxistin bikin, ji bo di warê pratîkî de reformên siyasî pêk werin."

Endama Civata Giştî ya Tevgera Goran Kiwêstan Mihemed jî di derbarê xebatên eniya hevpar û hewldanên tevgera wan de axivî û got: "Me gavên pratîkî ligel Komela Îslamî ya Kurdistanê û Eniya Hevpeymanî ya ji bo Demokrasî û Dadperweriyê avêt û me îtîfaqek çêkiriye. Guftûgoyên me didomin."

Kiwêstan Mihemed herî dawî wiha got; "Biryar e ku em di demekî nêzîk de, serdana Tevgera Azadî ya Civaka  Kurdistanê û Tevgera Îslamiya Kurdistanê jî bikin, ji bo bikarin hemû dengên nerazî kom bikin."