.jpg)
18.30
Hejmara kesên mirine: 9 hezar û 57
Li ser erdhejê rayedaran agahiyên fermî belav kirin: 9 hezar û 57 kes mirine. Hejmara kesên birîndar bûne 52 hezar û 979 kes e. Li aliyê din 6 hezar û 444 avahî hilweşiya ne.
17.30
Şaredariya Kobanî avahiyên zirardîtî hildiweşîne
Erdheja ku li bajarên Bakur li Mereş, Semsûr, Meletî, Entab, Amed û cihên din çêbû bandor li hin bajarên Rojava jî kir. Yek ji wan jî Kobanî ye. Li Kobanî hin avahiyan ji ber erdhejê zirar dîtin. Şaredariya Kobanî van avahiyan hildiweşîne. Ji bo gel zirarê nebîne xebatên hilweşandinê dewam dikin.
Heta niha 6 avahiyên li cem daristana bajêr û hin parçeyên stasyona Mistefa Derwêş hatine hilweşandin. Xebatên şaredariyê îro li cihên din dewam dikin.
Tîmên endazyariyê yên girêdayî şaredariyê li ser malan digerin û avahiyan kontrol dikin.
Di dema erdhejê de li Kobanî 3 kes birîndar bûbûn.
17.00
Semsûr bê çare ye
- Rojnameger Rabia Çetin ji Semsûrê agahî û vîdyo şandine û dibêje, "Li vê derê rewş gelek kambax e. Bila dengê van mirovan bê bihîstin. Li erdê cenaze hene, bi erebeyên destan cenazeyan dikişînin, mirov bi derfetên xwe ji bin avahiyên hilweşiyayî mirovan derdixin. Rewş gelek giran e."
- Gavek berê me bi hevalê me Welat Dilken re jî xeber da, li ser avahiyeke hilweşiyayî bû, alîkariya mirovan dikir. Wî jî radigihand ku xelk bi derfetên xwe dikin tiştan bikin. - Prof. Dr. Derya Unutmaz bi ser hesabê xwe yê twitterê re rewşa Semsûrê wisa anî ziman, "Semsûra me xilas bûye. Mixabin me xwe negihand xizmên me yên di bin avahiyên hilweşiyayî de, nîşaneya jiyanê jî nema. Hema her kesê ez nas dikim xizmên xwe, hevalên xwe ji dest dane. Ez gelek xemgîn im, bêçare me û di nav şoqbûyî de bêyî bişopînim tiştek din ji destê min nayê... Bila serê me sax be." 16.30 TTB: Di erdhejê de 10 doktor mirine TTB'ê (Yekîtiya Tabîbên Tirk) got ku di erdhejê de 10 hempîşeyên wan canê xwe ji dest daye. TTB'ê li ser hesabê xwe yê tora civakî re got ku li gor agahiyên pêşî ku gihîştine ber destên wan van doktoran canê xwe ji dest daye: Meletî: Dr. Ali Ekrem Tunçer Semsûr: Dr. Şerif Ayaz, Dr. Ali Ozturk, Dr. Burcu Şahin, Dr. Eyup Turkmen Hatay: Dr. Alper Sezer Aba, Dr. Fatma Tosun, Dr. Leyla Surmeli Eyvaz, Prof. Dr. Tulin Durgun Yetim Edene: Dr. Ahmet İrfan Gedik
16.00
Rewşa Amedê
Li Amedê li gor agahiyên ku hatine heta niha 130 kesî canê xwe ji dest dane. 6 avahî hilweşiyabûn. 871 kesên ji bin avahiyên hilweşiyayî derxistin rakirine nexweşxaneyan. Texmîn ew e ku dor 350 kesî hê di bin avahiyan de ne.
15.00
27 kesên ji Rojava li Entabê mirine
Li gorî agahiyên rayedarên Rêveberiya Xweser 27 kesên li Entabê di erdhejê de canê xwe ji dest dane. Cenazeyên wan birin Rojava.
Hevserokê Desteya Tenduristiyê ya Rêveberiya Xweser a Bakur û Rojhilatê Sûriyeyê Ciwan Mistefa ji bo çapemenî got ku wan cenaze ji deriyê Ewn Dadat ê di navbera Cerablus û Minbicê de wergirtine.
Ji kesên canê xwe ji dest dane 18 kes ji herêma Firatê ne, 7 ji Reqayê û 2 ji Sirînê ne. Ciwan Mistefa destnîşan kir ku wan cenazeyên qurbaniyan yekser radestî xizmên wan kirine.
Ciwan Mistefa anî ziman ku hin cenazeyên din jî, di deriyê Ewn Dadat re derbasî herêmê tên kirin, lewma dibe ku hejmara qurbaniyan zêdetir bibe.
14.00
Amed Spor 24 saet xizmetê dike
Rêveberiya Amed Sporê li Stada Tahir Elçi ji bo kesên pêdivî pê heye cih vekiriye û 24 saetan xizmetê dide.
Amed Spor xwarin, çay, qehwe dide kesên pêdivi pê heye û dibêje yên ku cihê wan nîn e bila li me bigerin.
13.00
Li Mereşê girtîgeh hat valakirin
Li girtiyên li Girtîgeha Tîpa L ya Turkogluyê şandin girtîgehên din. Girtiyan li malbatên xwe geriyan û ragihandin ku ji ber rewşa gitîgehê ne baş e ew şandine girtîgehên bajarên din wekî Aksaray, Enqere û Kayseriyê.
12.10
WHO: Ji bo Asta 3'yemîn Rewşa Lezgîn
Rêxistina Tenduristiyê ya Dinyayê (WHO) li ser erdheja li Tirkiye û bajarên kurdan çêbû, "Di Asta 3'yemîn de Rewşa Lezgîn" ragihand. Dîrektorê Herêma Ewropayê yê WHO'yê Dr. Hans Kliufe ev rewşa lezgîn ragihand. Ev yek tê waneya ku WHO bi hemû saziyên xwe hemû hebûna xwe dike seferberiyê.
Saet 12.00
Li gor agahiyên nû ku rayedaran belav kirin heta niha 7 hezar û 108 kes mirine. 40 hezar û 910 kes jî birîndar hene.
11.00
Amed
Li Amedê gelek kes li bin avahiyên hilweşiyayî de hene. Kes nizane tam çend kes hê li bin avahiyan in. Li avahiya 8 qatî ku ser çar 4 daîreyan bû xebat didomin. Vê sibê cenazeyê du kesan derxistin. Het aniha 23 birîndar derxistin. 23 kes jî dema derxistin miribûn.
Li Diyar Galeria ku 12 qatî bû xebat didomin. Cenazeyên 4 kesan hatin derxistin. Rayedar agahiyan belav nakin, lê tê îdîakirin ku heta niha 108 kes ji bin xirbeyê hatine derxistin.
Parêzer Feride Laçin ku girêdayî Baroya Amedê ye lîsteya 64 kasên ku hê li Diyar Galeria di bin xirbeyê de ne eşkere kir.
10.00
HDP'ê îro 30 TIR'an dişîne
Rêxistinên HDP'ê yên bajarên cur bi cur xebata komkirina alîkariyan didomînin. Navenda Kordînasyona HDP'ê ragihand ku îro 30 TIR'ên ku tiştên alîkariyê têde ne dişînin herêmê.
Kordînasyonê got ku ligel wan û AFAD'ê li hev kiriye ku hevkariyê bikin, dîsa AFAD astengiyan derdixe pêşiya wan.
Duh li Patnosê nehiştibûn Şaredariya Patnosê tiştên dane hev bişîne.
09.30 Lîgên Tirkiyeyê hatin rawestandin Federasyona Fûtbolê ya Tirkiyeyê (TFF) ragihand ku ji ber erdhejê maçên hemû lîgên Tirkiyeyê ji bo hefteyek hatine bi paş ve xistin. Berî vê biryarê maçên 7 û 8'ê mehê hatibûn betalkirin, niha maçên ku dê 10, 11, 12 û 13'yê mehê bihatana lîstin ji bo 17,18,19 û 20'ê mehê hatin talûqkirin.
Nûçeyên eleqedar:
- Karsaz Hamdi Ulukaya dê 2 mîlyon dolarî alîkarî bike
- Baroya Amedê kampanyaya komkirina pereyan da dest pê kirin
- HDP li Marmara û Egeyê ji bo erdhejzadeyan ketiye nava tevgerê
- Li 10 bajaran Rewşa Awarte hat ragihandin
- 07.02.2023, agahiyên li ser vê rojê
- Sekteretê Giştî yê NY'ê Guterres ji bo alîkariyê bang kir
- Erdeheja duyemîn, agahiyên nû (Tê nûkirin)
- Welat Dilken: Semsûr kavil bûye
.jpg)
.jpg)
.jpg)
