DiyarName.Com

Vê êvarê agahiyên nû

Dîrok: 07/02/2023

20.00

Vê êvarê encama nû hat eşkere kirin. Li gor agahiyên ku AFAD'ê eşkere kirin heta nih herî hindik 4.544 mirine. Li aliyê din 26 hezar û 721 birîndar hene.

18.30

Emniyet dijî komkirina alîkariya HDP'ê ye

HDP'ê li Şirnexê li 5 navendan komkirina alîkariyê dabû dest pê kirin. Lê li Êlika Şirnexê Midûriyeta Emniyetê astengî derdixe. Emniyet li HDP'ê geriyaye û gotiye hûn alîkariyê kom bikin emê der barê we de lêpirsînê bidin dest pê kirin. Li gor nûçeya MA'yê emniyetê biryara Rewşa Awarte wekî serem nîşan daye.

Pêşî li alîkariya Şaredariya Panosê girtin

Li aliyêdin li Şaredariya Panosê ku di destê HDP'ê de ye ev du roj in alîkarî dabû ser hev ku dê îro bişanda lê nehiştin kamyonên alîkarî lê barkirî bişînin. Hevserokê Şaredariya Panosê Emrah Kiliç wisa gotiye, "Ji bo şaredariyên AKP'ê tiştek nabêjin, lê pêşî li alîkariyên me digirin. Destûr nadin tiştên me dane hev em bişînin. Emniyet dibêje tiştek kom nekin. Ji bo ev alîkarî bigihînin cihê xwe çi ji destê me bê emê bikin."

Li aliyê din hat gotin ku li Wanê jî alîkariyên ku saziyên sivîl dane hev pêşî li wan girtine.

15.00

Mereş: 941 avahî bi temamî hilweşiyan

Mereş yek ji bajarên herî zêde bandor lê hatiye kirin e. Heta niha li gor hatine diyarkirin 941 avahî tam bi temamî hilweşiyane. Her wiha gelek jî jî zirar dîtine.

12.00

Oktay: 3 hezar û 419 kes mirine

Cîgirê Serokomarê Tirkiyeyê Fuat Oktay agahiyên nû belav kirin û got ku heta niha 3 hezar û 419 kes mirine. 10 hezar û 534 kes jî birîndar bûne.

11.30

Erdhejên dûvik didomin

Vê sibê li gelek bajarên erdhejê dîsa erdhejên dûvik çêbûn. Ya herî mezin li Meletî çêbû. Navend Puturgeya Meletî saet 10.11'an de bi meziniya 5.0 çêbû. Li Elbistana Mereşê saet 10.26'an de bi meziniya 4,5'an çêbû. Li Nurhaqa Mereşê saet 11.25'an de bi meziniya 4.4 çêbû. Di asta navbera 2 û 3'yan de gelek çêbûn.

11.00

Sûrên Amedê jî zirar dîtin

Sûrên Amedê ku di nav Lîsteya Mîrateya Çandî ya Dinyayê ya UNESCO'yê de ne ji erdhejê zirar dîtin. Hat dîtin ku li birca ku dikeve navbera Deriyê Çiyê û Çîftkapiyê derz çêbûye.

Duh li Keleha Endabê û li Keleha Necimê jî hilweşandin çêbûbû.

10.30

Li Sûriyê hejmar derket 1508'î

Li bajarên Sûriyeyê yên di bin destê rejîmê de û yên di bin destên hêzên tundiraw de, heta niha bi temamî 1508 kesî canê xwe ji dest daye.

Li bajarên Heleb, Hema, Lazqiye, Tartûs û Îdbilê rewş giran e.

Li Herêma Xweser rewşa nû

Ji bajarên kurdan li Efrînê rewş giran e. Ji bajarên ku di bin destê Rêveberiya Xweser de ne li Reqayê, dîsa li taxên Şêxmeqsûd û taxa Eşrefiye hin kesan canê xwe ji dest dane. Li van deran 6 kesî canê xwe ji dest daye.

Li bajarên din hin birîndar hene. Li gor agahiyên hatine li Kobanî û li Minbicê 6 birîndar hene.

10,00
3381 kes mirine

Vê sibê rayedaran hejmara kesên ji ber erdhejê canê xwe ji dest dan eşkere kirin.

Li gor daneyên hatine belavkirin heta vê sibê li 10 bajaran bi temami 3 hezar û 381 kesî canê xwe ji dest daye.

Bi temamî 20 hezar û 426 birîndar hene.

Dîsa bi qasî ku diyar kirine 5 hezar û 775 avahî xira bûne.

Li herêmê ji ber erdhejên dûvik didomin rayedar hişyarî didin ku xelk nekevin avahiyên xisar dîtî.

09,00

Bi mîlyonan mirov li derve bûn

Li Mereş, Entab, Meletî, Semsûr, Riha, Amed, Elezîz, Osmaniye, Edene û Hatayê bi mîlyonan kes şev li derve derbas kir.

Dîsa bi hezaran kes di bin kavilan de ne û li gelek bajaran hê kesî nekariye dest bide, alîkarî bide wan, wan derxe.

Foto: Welat Dilken / Semsûr