AMED
Hevserokê BDP'ê Selahattîn Demîrtaş, di çarçoveya kapmanyaya TZP-Kurdî ya bi navê "Ez perwerdehiya zimanê zikmakî dixwazim" keça xwe Delal ku îsal divê biçûya dibistanê, neşand dibistanê, beşdarî boykotê bû û ew şand qursa zimanê kurdî.
Demîrtaş got ku girêdayî pirsgirêka kurd zextên li ser kurdî zêde bûne û berdewam kir: "Çiqas dixwazin bila gefan bikin. Heta ev daxwaz neyê qebûlkirin dê pirsgirêka kurd wekî pirsgirêkeke siyasî bidome."

Hevserokê BDP'ê Selahattîn Demîrtaş, piştgirî da kampanyaya TZPKurdî. Demîrtaş berê jî diyar kiribû ku ew zarokên xwe naşîne dibistanê û di çarçoveya kampanyayê de keça xwe Delal neşand dibistanê û piştîgirî da boykotê.
Demîrtaş, ji bo ku keça wî fêrî kurdî bibe qeyda wê li KURDÎ-DER'ê çêkir. Delal tevî dê û bavê beşdarî dersa kurdî ya yekemîn bû.
Ders nêzî 20 deqîqeyan dom kir û birayê Delalê, Dilda jî piştgirî da wê. Demîrtaş, diyar kir ku berî ku Delal dersa tirkî bigire dersa kurdî girt, bi boykota dibistanan mafê perwerdehiya zimanê zikmakî ji aliyê hemû kesan ve tên nîqaşkirin.

Demîrtaş, li ser daxuyaniyên hikûmetê yên wekî 'ji bo berjewendiyên xwe zarokan bi kar tînin' sekinî û wiha got: "Berevajî vê yekê li Tirkiyeyê zarokên biçûk asîmîle dikin. Ji ber vê yekê zarokên dibistanan boykot dikin mafekî herî demokratîk bi kar tînin."

Demîrtaş, anî ziman ku ew wekî dê û bav ji bo ku zarokên wan fêrî zimanê xwe bibin wê bixebitin û dê fêde ji qurên TZPKurdî dane destpêkirin bigirin û wiha axivî: "Zimanê gelekî, rûmeta wî gelî ye. Îro zarokên kurdan ên tenê peyveke bi tirkî nizanin rêdikin dibistanan û ew tên asîmîlekirin."

Selahattin Demîrtaş, xwest ku hemû kes piştgiriyê bidin kapmanyaya TZPKurdî û ev kampanya tenê bi vê yekê sînor nemîne. Demîrtaş, da zanîn ku divê her kes bi awayekî çalak hînê kurdî bibe, ji bo vê yekê xebatekî xurt bike; tenê bi vÎ awayî em dikarin asîmîlasyonê têk bibin.

Demîrtaş, daxuyaniyên Serokwezîr Erdogan, Wezîra Perwerdehiyê Nimet Çubukçu û Waliyê Amedê Mustafa Toprak nirxand û anî ziman ku sedema van daxuyaniyên tehdîtkar serketina boykotê ye û wiha berdewam kir: "Çiqas dixwazin bila gefan bixwin. Heta ev daxwaz bi cih neyê dê pirsgirêka kurd wekî pirsgirêkeke siyasî bidome."

Demîrtaş, diyar kir ku tu rayedarên dewlet û hikûmetê li esasê meseleyê mêze nakin û gefan li malbatan dikin.

Paşê jî Berdevka TZPKurdî Xecê Şen, diyar kir ku ji ber piştgiriya BDP'ê daya wan ew kêfxweş in.