Diyarname
Hat ragihandin ku Wezareta Perwerdehî ya Sûriyeyê biryar daye ku xweseriya Zanîngeha Rojava û Zanîngeha Kobanî betal bike, wan bi zanîngehên din ve girê bide.

Li gor hatiye ragihandin Zanîngeha Rojava bi Zanîngeha Feratê û Zanîngeha Kobaniyê jî bi Zanîngeha Helebê ve tê girêdan. Li ser vê yekê ji her du zanîngeha hê tu daxuyaniyeke fermî nehatiye dayîn.

Li gorî biryara bi hejmara 69'an "Fakulteyên Zanîngeha Rojava bi Zanîngeha Firatê re dibin yek". Li gor biryara bi hejmara 71'ê "Fakulteyên Zanîngeha Kobanî bi Zanîngeha Helebê re dibin yek".

XWENDEKARAN DAXUYANî DABÛN
Xwendekarên Fakulteya Perwerdeyê û Fakulteya Endezyariya Avahîsaziya Ekolojî yên Zanîngeha Rojava li ser nêzîkatiyên Wezareta Perwerdeya Bilind û Lêkolînên Zanistî roja2 5'ê mehê  li ber avahiya Zanîngeha Rojava ya li bajarê Qamişloyê daxuyanî dabûn.

Xwendekarên Zanîngeha Rojava girêdana xwe ya bi mîsogerkirina mafê perwerdeya bi zimanê kurdî di hemû qonaxên xwendinê de kiribû û daxwaz kiribû ku Zanîngeha Rojava ji hêla akademîk û îdarî ve serbixwe be.

NÎQAŞ ÇI BÛ?
Berî niha bi demek hatibû nîqaşkirin ku  Zanîngeha Rojava û Şaxa Zanîngeha Feratê ya li Hesekê bibin yek û navê Zanîngeha Hesekê li wan bê kirin. Niha biryareke din hat girtin û li gor vê Zanîngeha Rojava bi Zanîngeha Feratê ve hat girêdan. Navenda Zanîngeha Feratê li Dêrezorê ye.

Berî vê biryarê, roja 25'ê mehê Xwendekarên Zanîngeha Rojava li ber avahiyê daxuyanî dabûn çapemeniyê.