NAVENDA NÛÇEYAN
Daxuyaniyên bi mebesta piştgiriya kampanyaya TZPKurdî ya "boykota dibistanan" xwendekar naçin dibistanan. Di çalakiyên li Amed û Şirnex hatin li dar xistin de daxwazên perwerdehiya kurdî bilind bûn.
AMED
Rêxistinên jinan ên li Amedê, bi armanca piştigiriya kampanyaya "boykota dibistanan" a TZPKurdî ya bi daxwaza perwerdehiya zimanê kurdî da destpêkirin li ber Lîseya Bîrlikê daxuyanî dan çapameniyê. Selîs, Kardelen, DÎKASUM, Komeleya Jinan a Ekîn Cerenê bi daxuyaniyek hevpar piştgirî dan kampanyayê. Li ser navê rêxistinên jinan Endama Komeya Jinan a Selîs'ê Perîhan Kaya, daxuyanî da. Kaya, destnîşan kir ku Tirkiye peymana navneteweyî ya mafên ziman, çand, aborî û siyasî binpê dike û wiha got: "Heta qedexeya zimanê kurdî bindome pirsgirêka kurdî jî dê bidome." Kaya, xwest hemû kes bi kurdî biaxivin û piştgiriyê bidin boykotê.
ŞIRNEX
Li Navçeya Herzexê ya Şirnexê jî, bi heman armancê xwendekaran dibistan boykot kirin. Li navçeya hejmarek zêde ya xwendekaran neçûn dibistanê, hat ragihandin ku polîs li dibistanan digerin û lîsteya xwendekarên neçûna dibistanê digirin. Li derdorê Lîseya Îdil, Lîseya Pişîyî ya Endustrî û Lîseya Anatolyayê tedbirên ewlehiyê yên berfireh hatin girtin. Xwendekarekî nexwest navê xwe bide wiha got: "Komîserek li dibistanan geriya. Ji midûrên dibistanan hejmara xwendekarên nehatine dibistanê pirsîn. Û gotiye dê kotrola sala borî û ya îsal bînin beramberî hev."
DÎHA