Diyarname

Duyemîn çalakiya "Wêje Dîroka Xwe Dinivîse" bi beşdarbûna nivîskarên kurd li Zanîngeha Bogaziçi’yê pêk hat.

Di çarçoveya xebata Komeleya Nivîskarên Kurd a bi nave “Wêje Dîroka Xwe Dinivîse” de li Zanîngeha Bogazîçî paneleke li dar ket. Di panelê de nivîskar Remezan Alan axaftinek kir û li ser ‘‘Romana Kurdî’’ sekinî.

Panel ji ber ku ji aliyê Beşa Edebiyat û Zimanê Tirkî ve hatibû lidarxistin, zimanê panelê bi tirkî bû.

Kurd dixwazin xwe bigihînin modernîzmê

Nivîskar Remezan Alan destpê pirsa; “Gelo çima romana kurdî dereng ma?” kir û wiha berdewam kir: “Ji ber sedemên erdnîgarî, îmha û înkarê romana kurdî dereng ma.”

Alan anî ziman ku romana kurdî virnî ye, mirov dikare zayîn û mirina wê bişopîne û wiha got: “Di hemû dinyayê de roman pêş ve diçe û gelek tê xwendin. Yek ji sedemên pêşkêtina romana kurdî jî ev e, yanê rewşa roman a dinyayê. Ya duyemîn jî kurd dixwazin xwe bigihînin kesên ku modernîzm dane dest pê kirin.”

Nivîskar Alan wekî bavê romana kurdî Erebê Şemo dest nîşan kir û diyar kir ku romana kurdî di diasporayê de dest pê kiriye. Wî bibîr xist piştî 1980’ê Swêd bûye kreşa romana kurdî, paşê piştî 1991’ê li bakur jî ji ber ku qedexeyên li ser nivîsandina kurdî hindik be jî rabûn, romana kurdî hêdî hêdî li vir jî pêş ket.

Alan li ser rewşa niha ya weşanên kurdî jî ev yek anî ziman: “Helbet hejmara pirtûkên kurdî her roj zêdetir dibe lê gelo mirov dikare bêje xwendevan û piyaseya xwe jî bi xwe re pêş ve dibe? Helbet na!”

Remezan Alan anî ziman ku romana kurdî ji nivîskar zêdetir bersiveke kolektîf e ku li hember înkar û îmhayê tê dayîn.

Pêşniyara ji bo nivîskar

Nivîskar Alan li ser pirsgirekên romana kurdî yên rojane jî sekinî û got: “Gelek caran ji ber alegoriya neteweyî di romanên kurdî de anakronîzmek heye. Pisrgirekeke din a bingehîn jî nivîskar li ser ez çi binivîsim disekine. Divê nivîskar li ser çawa binivîsim bisekine.”

Alan bi van gotinan dawî li axaftina xwe anî: “Helbet divê mirov romana kurdî li ber çavên xwe zefh mezin neke lê qedir û qîmetê bidê û bişopîne û bixwîne.”

Her wiha helbestvan û nivîskarên kurd Berken Bereh, Arjen Arî, Dilawer Zeraq, Lal Laleş, Yaqob Tilermenî, İrfan Babaoglu, Şêxmûs Sefer û Lorîn S. Dogan jî beşdarî çalakiya li Bogaziçiyê bûn. Nivîskaran piştî panelê bi xwendekaran re sohbet kirin.

***

Nûçeyên eleqedar:

- Yekem çalakiya "Wêje Dîroka Xwe Dinivîse" li dar ket

- Nivîskarên kurd îro li NÇM'ê ne

- Çalakiyên "Wêje Dîroka Xwe Dinivîse" li Stenbolê dest pê dikin

- Nivîskarên kurd ji bo çalakiyên wêjeyî li Stenbolê civiyan

***