Diyarname
YEW-KURD, PEN'a Kurd û Komeleya Wêjekarên Kurd li avahiya Komeleya Wêjekarên Kurd de daxuyanî da çapemeniyê û banga tevlêbûna Fûara Pirtûkan a Amedê kir.
9'emîn Fûara Pirtûkan a Amedê ya ku ji aliyê TUYAP'ê ve tê organîzekirin îsal di navbera 18-26'ê mehê de li dar dike. Ji bo fûarê daxuyanî hat dayîn. Hevseroka YEW-KURD'ê Asya Genim kurmanciya daxuyaniyê, Hevserokê Komeleya Wêjekarên Kurd Haci Ozkal jî kirmanckiya wê xwend.
'WERIN EM BI HEV RE XWEDÎ LI BÎRA XWE DERÊN'
Di daxuyaniyê de hat gotin ku "Xebatên çand û ziman hemû beşên civakê têkildar dikin, bi hewldan û xebatên hin saziyên kurdî, nivîskar, weşanger, rojnamegeran problema ziman û bişaftinê heta radeyekê tê çareserkirin. Civaka kurdan bi hemû beşên xwe, bi siyaset, aborî, medya, sazî û dezgeyên xwe berpirsê zimanê xwe ne. Divê li gorî girîngiya vê berpirsiyariyê tevbigerin" û wiha hat domandin, "Her mirovê hişnas û hişmend bi vê yekê baş dizane; mirov hewcedarî ziman e. Civaka bêziman bê kok e, bê bîr e, civaka bîra wê hedimî gav bi gav ji giyanê azadiyê dûr dikeve. Werin em bi hev re bîra xwe xwedî derkevin."
'EM DI KIRÎNA PIRTÛKAN DE ÇIKÛSIYÊ DIKIN'
Di daxuyaniyê de hat gotin ku armanc ew eku bi xebatên çand, ziman, huner û rewşenbîriyê, civakê li rêgeha wê, ango li reseniya wê vegerînin" û wiha dom kir, "Xwendin di pêşketina hişê mirov û hişê civakî de tevgera herî bi bandor e. Pêşketina civakê xwe li gorî rêjeya xwendinê çêdike. Dema me, aboriya me têra her karî dike, em dema xwe û aboriya xwe hêjayî her bûjen û karî dibînin. Lê di xwendin û kirîna pirtûkan de em çikûsiya demê û çikûsiya kirînê dikin.”
'EM AFIRANDINA XWE BI KURDÎ BIKIN'
Daxuyaniya saziyan bi van gotinan bi dawî bû, "Em jî wekî her civaka dinyê xwendina xwe, siyaseta xwe, ramangeriya xwe, afirîneriya xwe bi zimanê xwe, bi kurdî bikin. Berxwedana herî mezin a li hemberî bişaftinê, axaftin û xwendina kurdî ye; bi vê şiyarê, hişê hatiye fesilandin wê saziyên kurdî, berhemên kurdî û xebatên kurdî, a girîng jî wê rihê kurdî hembêz bike. Ziman ala neteweyan e, ziman metrîsa berxwedanê ye, ziman ezmanê me ye, ziman xaka me ye, ziman doza herî mezin a hebûnê ye.”
***
Nûçeya ELeqedar:
- Dema Fûra Pirtûkan a Amedê eşkere bû