Diyarname
Lîstikvan Erdal Kaya bi navê “Vik û Vala” stand-upek amade kiribû û hê jî ew stand-up derdikeve ser dikê. Niha metna vê stanr-upê wekî pirtûk çap bû. Stand-upa ku teksta wê Erdal Kaya û Turgut Kaya (Rênas Kaya) bi hev re nivîsandibûn wekî pirtûk ji Weşanên Pallê derket.
Stand-upa “Vik û Vala” heta niha li dehan bajarên kurdan û yên Tirkiyeyê û her wiha li Ewropayê jî derket ser dikê. Vê carê ne wekî lîstik, lê teksta wê li ber destên xwendevanan e.
Weşanxaneyê wisa daye nasîn; “Tam di wir de, di wê krîzê de yek hewce ye, yek. Çetîn abê! Hûn dikarin zava bi xwe re nebin wir ha, lê divê Çetîn abê li wir be. Di her sulaleyê de Çetîn abêyek heye, belkî di sulaleya we de navê wî ne Çetîn be, lê ji sedî heftê û pênc Çetîn in. Çetîn abêyê malbata xwe bînin ber çavê xwe: metreyek û nîv, ji min jî kintir e, wilo bifikirin. Porê wî her car şayîkkirî. Riha wî tuneye, her car diqusîne. Çileyê, havînê, ferq nake, her carê êlegek lê ye, ew êlegê bêmil. Du berîk li wir, du berîk li vir.”
ERDAL KAYA KÎ YE?
Erdal Kaya di sala 1987’an de li gundê Keverzoyê yê girêdayî Êlihê hate dinê. Li Êlihê bi awayekî amator dest bi şanoyê kiriye. Li Zanîngeha Afyonkarahisarê beşa Ziman û Wêjeya Tirkî xwendiye û di sala 2007’an de li Şanoya Bajêr a Afyonkarahisarê bi awayekî profesyonel gav avêtiye nav cîhana şanoyê. Di şanoyên wekî Yenisahne, Şanoya Bajêr a Êlihê û Şanoya Bajêr a Amedê de wekî lîstikvan û derhêner cih girtiye. Erdal Kaya yê ku di sala 2023’yan de berê xwe da stand-upê û “Vik û Vala” û “Zikopişto” van xebatên xwe didomîne.
TURGUT KAYA (Rênas Kaya) KÎ YE?
Rênsa Kaya di sala 1991ê de li Keverzoya Êlihê hate dinê. Dibistana seretayî û navîn li Êlihê xwendiye. Beşa Têkiliyên Gel û Danasînê qedand û di sektora reklamê de xebitiye. Piştî ku perwerdehiya nivîskariyê wergirt, berê xwe da afirandinên wêjeyî. Bi Erdal Kaya re nivîskariya stand-upên Vik û Vala û Zikopişto kir. Niha jî ji bo platformên medyaya civakî naverokan disêwirîne û xebatên wêjeyî didomîne.
Xwîner dikarin kitêbê ji pallwesan.com û kitêbfiroşan bixwazin.