Diyarname

Tîma neteweyî ya Gallerê di dîroka xwe de yekem car derketibû Şampiyoniya Ewropayê û her ku diçe vê "yekemîniyê" didomîne. Galler di maça çarîk fînalê de îro li hemberî Belçîkayê ku ew yek ji favoriyên şampiyoniyê bû derket sehayê. Galler ku tîma surprîz a vê şampiyoniyê bû ev surprîziya xwe domand. Galler bi 3-1 bi ser ket û derbasî nîv fînalê bû. Galler yekemîn car dê di şampiyoniyeke wisa de nîv fînalê bilîze.

Di deqîqeya 31'ê de Ashley Williams, deqîqeya 55'an de Robson-Kanu û deqîqeya 86'an ed Sam Vokes li ser navê Galler sê gol avêtin û dîrok nivîsandin. Belçîka ku di Kûpaya Cîhanê de (2014) jî di çarîk fînalê de têk çûbû lê hêviyek mezin dabû. Di vê tûrnûvayê de Belçîka yek ji tîmên favorî bû lê encax karî heta çarîk fînalê bê. Tekane gola Belçîka a di vê maçê de di deqîqeya 13'yan de Nainggolan avêt. Nainggolan golek gelek xweş avêt û tîma xwe derxist pê, lê paşê nekarîn vê serketinê biparêzin.

'Me xeyal kir û pêk anî'

Teknîk Dîrektorê Galler Chris Coleman piştî maçê wisa got: "Me lîstika pasdayînê lîst, me gog gerand. Me nîşanê her kesî da ku em tîmek ofansîf in. Bila her kes xeyakirinê bidomîne. Me xeyal kir, me her dem serketin xeyal kir. Ji windakirinê em netirsiyan, ji ber vê em bi ser ketin. Dibe em têk jî biçûna lê me xeyal kir. Di nîv fînalê de emê hev bibînin."
Bi vê serketinê Galler di nîv fînalê de bû reqîbê Portekîzê. Maça wan dê 6'ê vê mehê saet 22'yan (li gor saeta Tirkiyeyê) de bê lîstin.