Huner Faris / Silêmanî / Rojnews

Îsal ji ber hişkesalî û qirêjbûna xwezayê, berhemê hungiv gelek kêm kiriye. Tê gotin ku li parêzgeha Silêmaniyê îsal ji sedî 80’yê berhemê hungiv kêm bûye.

Xweza û av hewaya Herêma Kurdistanê ji bo xwedîkirina mêşên hingîv destdaye, hungiv dikare bibe çavkaniyek girîng a dahatê. Lê Hikûmeta Herêmê nekariye bi qasî pêwîst alîkariya kesên mêşan xwedî dikin bike.

Li gorî rapora Wezareta Çandinî û Çavkaniyên Xezayî ya Hikûmeta Herêmê ku di sala 2020’an de belav kir, zêdetirî 11 hezar kesên meşên hungiv xwedî dikin, li Başûrê Kurdistanê hene. Li gorî raporê, salane zêdetirî 750 ton hungivê ji curê herî baş bi dest dixin. Lê îsal ev rêjeya berhemanîna hungiv li gorî salên din kêm kiriye.

HUNGIVÊ HACÎ OMRAN, QENDÎL Û ŞARBAJÊR

Îbrahîm Mecîd 30 sal in bi karê mêşvaniyê ve mijûl e. Îbrahîm sedema kêmkirin û zêdebûna berhemê hungiv bi guhertinên xwezayî ve girê da. Îbrahîm da zanîn cihên ku xwezaya wê paqij e û ji qerebalixiya bajar dûr e, hungivê wan deran gelek baş e.

Her wiha got, “Salên borî rêjeya berhemanîna hungiv li deverên deşt zêdetir bû ji herêmên çiyayî. Lê îsal hungivê çiyê zêdetir e. Ji bo mînak îsal hungivê çiyayên Hacî Omran û Qendîlê baştir e ji yê par. Lê îsal hungivê navçeya Şarbajêr ne wekî par baş e.”

ŞEWATA DARAN Û HUNGIV

Îbrahîm Mecîd destnîşankir şewitandin û birîna daristanên Başûrê Kurdistanê ya ji aliyê dewleta Tirk ve, ziyanek mezin bi kerta mêşvaniyê gihandiye. Îbrahîm daxwaz ji mêşvanan kir daran û şînkatiyê bi çînin ji ber ku xwezaya têr şînkatî dibe sedem berhemê hingiv zêde bibe.

JI 500 TONÎ DAKETINA 150 TONÎ

Li gorî amarên Navenda Mêşvanên Silêmaniyê, li sinorê parêzgeha Silêmaniyê nêzî 125 hezar sindoqên mêşan hene û hejmara kesên mêşan xwedî dikin nêzê 3 hezar kes e. Salane tenê li sînorê parêzgeha Silêmaniyê zêdetirî 500 ton hungiv berhemtînin. Lê li gorî pêşbîniyên Navenda Mêşvanên Silêmaniyê, wê îsal nêzî 150 ton hungiv bikarin bidest bixin.

Berpirsê Navenda Mêşvanên Silêmaniyê Dilşad Mihemed ji bo Ronews got, “Rêjeya berhemanîna hingiv li gorî salên borî îsal nêzî ji sedî 80 kêm kiriye û tê pêşbînî kirin îsal li sinorê parêzgeha Silêmanî 150 ton hingiv were bi destxistin.”

Têkildarî sedemê kêmbûna hingiv jî Dilşad got, “Nebûna barana pêwîst di demsala biharê de bûye sedem şiliya di erdê de kêmbe. Kêmbûna şiliyê jî rêjeya şiliya di gulan de kêmkiriye û ew jî bûye sedem berhemê hingiv îsal kêm bibe.”