Nenas Hîçîstanî 

Ji nişkê ve xwe di bin pêlên fikr û ramanan de dît. Veciniqî… Fikr û raman pêl bi pêl bi ser wî de dihatin. Hinek ji wan bi tirkî û hinek jî bi kurdî bûn. Wekî xewnên wî bi du zimanî bûn. Nikaribû van ji hev û du veqetîne. Xwe di nav wan de dîlgirtî hîs dikir. Hem nikaribû xwe ji wan pêlan xilas bike û hem jî nizanîbû bi kîjan zimanî bibersivîne wan pêlên pirsan. Dixwest xwe ji hiş û êqil xilas bike da ku ji neçariya bêhempayê bifilite.

Lê baqilîbûn jê re bûbû barekî giran. Xwe bi wî re wekî dîlgirtî didît. Sîsîfosê ji aliyê Zeûsî ve cezakirî hate bîra wî. Aqil jê bûbû zinarê Sîsîfosî… Jê xilasbûn ne pêkan bû. Digel wan tiştan tenê bi du zimanan zanîbû, her du jî nîvcomayî bûn. Pirs bi xwe jî hin caran bi kurdî dest pê dikirin û bi tirkî diqediyan. Bersivên wan jî wekî pirsan bi du zimanî bûn. Lê her du jî nivîşkan bûn. Wekî du zarokên negihîştî bûn. Bi pêlên fikr û ramanên nivîşkanî dora wî hîsên şehitîbûnê (felcbûn) dorpêç kirîbû. Serî jê bûbû wekî serê çiyayên bi mij û dûman e. Li wir her tişt şêlû dixuya. Xwe wekî karxezaleke di bin êrîşên şêr û keftaran de hîs dikir. Di neçariyeke bêhampa de bû…

Gelo ew bêbextiya bi vî rengî ji çi bû? Nizanîbû gilî û gazincên xwe bi kê bike. Bi Xwedê, bi dîrokê, bi civakê?... Bi fikr û ramanan hebûna wî jê bûbû êş û keser. Laşê wî dest bi ricifînê kir da ku xwe ji êqil xilas bike. Li ser eniya wî xwêdan bûbûn wekî morîkan û bi xwar ve dihatin. Ji her tiştî kerixî hîs dikir xwe. Tenêtiyeke giran bi ser wî de hatibû. Bêkes û bêxwedan bû. Tu tiştî nediviya. Bi  tenê rizgarîbûna ji wê rewşê diviya.

Ji nişke ve nexşeya di diwêr de aliqî ber bi çavên wî ket. Di wir de rastî li nexşeya Tirkiyeyê hat. Çavên xwe kutayê. Xweziya xwe bi welatekî din anî. Ma di dinyayê de cihekî din tune bû ku ew li welatekî ew qas bêbext û kambax de hatibû vê dinyaya bextreş. Tu xêr û xweşî ji wî welatî nedîtîbû. Hebûna wî welatî her ku diçû jan û kovanan li jiyana wî zêdetir dikir. Lanetên xwe bi wî anî û bi xew re çû… Xeweke kûr û xweşik ew hembêz kirîbû wekî ‘dayikeke çiyayî’…. 
       

ciyanakli@hotmail.com

***

Nivîsên Nenas Hîçîstanî yên ku berê di Diyarnameyê de hatine weşandin:

- Zimanê Bindestî
- HÎÇÎSTAN