Amed
Li Amedê mebûsên DTP'ê û Şaredarên DTP'ê ji bo piştgiriyê bûn aboneyê rojnameya Azadiya Welat.

DTP'ê bi armaca şermezarkirina pêkutiyên li ser çapemeniya ji kevneşopiya çapemeniya azad tê û bi armanca piştgiriya qampanyaya, "Êdî bes e em bi zimanê xwe perwerdahî dixwazin" a ji aliyê TZPKurdî ve hatiye destpêkirin, li Amedê jî qampanyaya abonetiya Rojnemeya Azadiya Welat bi daxuyaniyekê da destpêkirin. Daxuyanî li Avahiya DTP'ê ya Bajêr bi tevlibûna parlamenterê DTP'ê yê Amedê Akin Bîrdal, parlamentera DTP'ê ya Êlihê Ayla Akad Ata, Şaredarê Bajarê Mezin ê Amedê Osman Baydemîr, Şaredarên navçeyên Amedê, Serokê Şaxa Egîtîm Senê ya Amedê Abdullah Karahan, ÎHD, TZPKurdî, Meclisa Jinê ya Bajêr a Amedê, rêveberên Rêxistina DTP'ê ya Amedê û xebatkarên rojnameya Azadiya Welat pêk hat. Cîgirê Serokê Rêxistina DTP'ê ya Amedê Alî Şîmşek, daxuyanî xwend û diyar kir ku kurd ji dînamîkên girîng ên Rojhilata Navîn in û da zanîn ku kurd dengê xwe bi çapemeniya azad didin bihistin. Şîmşek wiha berdewam kir: "Li ser çapemeniyên ku der barê pirsgirêka kurd de tiştên baş û girîng dibêjin êrîş û pêkutiyan kêm nabin. Ev saziyên çapemeniyê tên girtin û qedexekirin. Her roj an kovarek an jî rojnemeyek tê girtin."

Şîmşek, anî ziman ku gotinên hêzên desthiladar û Serokwezîr Recep Tayyîp Erdogan, ji zihniyeta wan a tekparêz tê û wiha domand: "Tê dîtin ku zihniyeta tekparêz nahêle tu çapemeniyên deng cuda û muxalîf bijîn. Zihniyeta tekparêz li hemberî çapemeniya kurd jî bê tehemûliyê nîşan dide. Ji bo vê mînaka herî baş rojnameya Azadiya Welat e. Her roj pêkutî li ser rojnameyê û xebatkarên wê tên meşandin."

Şîmşek da zanîn ku rojnameya Azadiya Welat ji bo ziman û çanda kurd gelek girîng e û wiha got: "Em girtina Azadiya Welat wekî qedexekirina ziman û çanda kurdî dinirxinin. Wekî DTP'ê bi armanca şermezarkirina pêkutiyên li ser ziman û çapemeniya kurdî, kampanyaya abonetiya rojnameya Azadiya Welat didin destpêkirin. Em bang li hemû nûner û endamên xwe dikin ku bibin aboneyên Azadiya Welat."

Piştî daxuyaniyê, parlamenter, şaredar û hemû DTP'î li ber kamerayan bûn aboneyên Azadiya Welat. Parlamenterê DTP'ê Akin Bîrdal, navnîşana ku dê rojname biçê, wekî Meclis nîşan da û got, "Ez hêvî dikim ku li pêşiya xwendina rojnameya bi kurdî astengiyan dernexin."

Di daxuyaniyê de rojnamegerek gotinên Cîgirê Serokê Giştî yê AKP'ê Huseyîn Tanriverdî yên wekî, "Dema kesekî AKP'î hate hilbijartin hûn nas nakin. Li cihekî ku şaredarê me lê be, esnaf dikanên xwe nagirin, zarok dê şûna keviran, bi topê bilîzin" ji Şaredarê Bajarê Mezin ê Amedê Osman Baydemîr kir. Li ser vê yekê Baydemîr wiha got: "Em ji bo Welat li vir in. Em rojeva xwe naguherînin. Lê di kurdî de gotine wekî, 'Dema mirîşk birçî dibe, xwe di nava embara genim de dibîne' heye. Ya wan jî ev mesele ye." Li ser vê yekê kesên li salonê li çepikan xistin.