Amed
Bi armanca balkişandina ser Bajarê Dîrokî Heskîfê ku wê bi Bendava Ilisuyê re di binê avê de bimîne, li Bismilê bi slogana 'Ji cihê wê nebe bigihîne pêşerojê' bi tevlîbûna 20 hezar kesan bernameyek hate lidarxistin.

Teşebûsa Jiyandina Heskîfê, bi armanca balê bikişîne ser rewşa Heskîfê ku wê bi Bendava Ilisuyê re di binê avê de bimîne, di çarçoveya bernameyên bi slogana 'Ji cihê wê raneke bigihîne pêşerojê' li bajarên herêmê tên lidarxistin de, li Navçeya Bismil a Amedê jî bernameyek pêk anî. Parlamentera DTP'ê ya Amedê Gultan Kişanak, Serokê Rêxistina DTP'ê ya Amdê Nejdet Atalay, rêveberên Rêxistina DTP'ê ya Navçeya Bismilê, Şaredara Bismilê Şukran Aydin, endamên Nûnertiya Egîtîm Senê ya Navçeyê, Berdevkê Teşebûsa Jiyandina Heskîfê ya Êlihê Parêzer Ferhat Bayindir jî di nav de nêzî 20 hezar kes beşdarî bernameyê bûn. Di bernameya ku sloganen "Heskîf a me ye dê ya me bimîne", "Destîn dirêjî heskîfê bibin bila bişikên", "Qatil Erdogan, xwezayê qetil neke" hatin avêtin de, Parêzer Bayindir, bal kişand ku tê xwestin Heskîf di binê avê de bimîne.

Divê gelê qedîm li dîroka xwe ya qêdîm xwedî derkeve'

Bayindir, destnîşan kir ku wê li herêmê rêze çalakiyan li darbixin û da zanîn herêma bi sedema pevçûnên ev 30 sal in tên jiyîn tê bêmirovkirin, niha jî ji ber çêkirina bendavan bi hezaran mirov neçar dimînin koç bikin. Bayindir, wiha dom kir: "Em dê li Mêrdîn, Şirnex û Sêrtê çalakiyan pêk bînin. Li vê coxrafyayê ev 30 sal in rewşek bi pevçûn heye û hîn jî pevçûn didomin. Tenî ji bo şer 500 milyar dolar pere hatiye xerckirin. Nêzî 4 hezar gund hatin şewitandin. Dema gel ji gundê xwe derket li metrepolan di nava xizaniyê de şerpeze bû. Wekî rêxistinên civakî yên sivîl me sekreteryayek ava kir. Armanca me Ew e ku em destûrê nedin Heskîf di binê avê de bimîne. Lewre Heskîf dîroka me ye, Heskîf pêşeroja me ye."

‘Dîroka xwe bi 2-3 qrûşan ne firoşin’

Şaredara Bismilê Şukran Aydin jî, gotina Serokwezîr Recep Tayyîp Erdogan a "Em dê Heskîfê rakin cihekî din" bibîr xist û wiha got: "Zarok baweriya xwe bi vê gotinê naynin. Birêz Erdogan tu mafê qetilkirina çanda vî gelî ji ku derê dibînî? Daxwaza we ew e ku hûn pêşeroja gelê kurd tune bikin." Aydin, bang li gel kir ku mîrateya dîrokî û axa bi bereket a herême bi 2-3 qruşan nefiroşin. Parlamentera DTP'ê ya Amedê Gultan Kişanak jî, da zanîn tevgeler têkoşîna mirovahiyê din in û anî ziman ku xwedîlêderketina Heskîfê xwedîlêderketina mirovahiyê ye. Kişanak, wiha got: "Em li mirovahiya ku rêya me rohnî dike xwedî derdikevin. Ev bendav dibin sedema komkujiya xweza û çandê. Îro cîhan êdî li enerjiya paqij digere. Bingehê vê yekê jî enerjiya bayê ye. Tirkiye li ser vê yekê mijûl nabe û li hemberî mîrateya dîrokê êrîşan pêk tîne. "

Piştî axaftinan koma Şanoyê ya Arsen Poladof a di bin banê Navenda Çand û Hunerê ya Bihar (BKSM) de xebatên xwe dimeşîne derket ser dikê. Hunermend Havîn ku bi Koma Delîla re derket ser dikê, gel coşand. Herî dawî jî hunermend Bulent Turan ji aliyê 20 hezar kesan ve bi çepik û sloganan hate pêşwazîkirin. Şahiya ku bi starên Turan re wergeriya mitîngê heta derengiya şevê dom kir.

Ji DÎHA'ye hatiye girtin