Li dawiya şer,

şervanekî can da, yek jê ve nêz bû 

û jê re got: “nemire, bêpayan he'j te dikim!”

Lê axx! her ku çû cendek sartir bû.

Du hebên din jê ve nêz bûn

û lê dubare kirin:

“Terka me meke! Ber xwe bide, de haa! Li jînê vegere!”

Lê axx! her ku çû cendek sartir bû.

Bîst, sed, hezar, û pêncsed hezarên din

Berev wî ve reviyan,

bi hawar gazî: “Ev çend eşq û hez, lê tu hêz nikare bi mirinê!”

Lê axx heyf! her ku çû cendek sartir bû. 

Di dêv de yek dua,

mîlyonan dor lê pêçan: “Birawoo, meçe!”

Lê axx heyf! her ku çû cendek sartir bû. 

Elqise, şêniyên rûzemînê tevan

dor lê pêçan; cendek kûr û bikelekel, awirekî pormijî li wan veda;

hêdîka tevrabû,

merivê ‘ewil ê berev xwe ve hembêz kir; û dest pê kir meşiya...

10 mijdar 1937

CESAR VALLEJO 
ji fransî: yeqîn h.

***

*CESAR VALLEJO, ango bi navê xwe yê din César Abraham Vallejo Mendoza, nivîskar û helbestkarekî karîger ê Perûyî ye. 16 adara 1892’yan li li bakurê Perûyê, li bajarê Santiago de Chucoyê, li gundekî biçûk ê çiyayên Andê çêbûye. Ji malbateke ku bi‘esil binecih-îspanyol e. Di salên ciwaniyê de pêwendî ligel helbestê daniye.

Dad û wêje xwendiye, çend caran dev ji xwendinê berdaye û dîsa lê vegeriyaye. Di 1915’an de di beşa wêjeya îspanyolî de lisansa bilind xwendiye. Di 1921’ê de li Trujilloyê, wexteke kurt di girtîgehê de maye. Di 1923’yan de koçî Parîsê kiriye û heta bi mirina xwe li Parîsê niştecih maye. Karê rojnamegeriyê jî têde gelek kiriye. Têbiniyên gerê, gotar û lîstikên şanoyê nivîsiye. Tev li şerê navxweyî yê Îspanyayê bûye û pêwendiyeke wî ya dostane bi F.Garcia Lorca, Rafael Albertî û gelek helbestkarên din re çêbûye.

César Vallejo, yek ji helbestkarên mezin yên ziman-îspanyol tê binavkirin. Wekî helbestkarê herî navdar ê Perûyê tê zanîn û her wiha yek ji nûjenparêzê welatên Amerîkaya Latîn ê sedsala 20’an e.

Temayên helbestên wî bêtir mijarên civakî yên wekî bindestî, newekhevî, mirin, êş, kêm be jî evîn û helbet Parîsa ku lê miriye ye! 

Bêtir bi îspanyolî û kêmtir be jî bi fransî nivîsiye.

César Vallejo, 15’ê Nîsana 1938’an, rojeke înê (ne pencşemê!) ya bi şilî li Parîsa Fransayê miriye û navê wî piştî mirina wî deng daye!

Hin berhemên wî:

- Los Heraldos Negros/Peyamnêrên Resiyê: 1919, Helbest

- Trilce: 1922, Helbest

- Tungsten: 1931, Roman 

- Poèmes Humains/Helbestên Însên: 1939(P.M.), Helbest

- Poésie Complète/Hemû Berhem: 1965 (P.M.), Helbest

Têbiniya Diyarnameyê: Nivîskarê me yeqîn h. ji du hefteyan carek helbestek, an pexşanek Cesar Vallejo werdigerîne û di quncikê xwe de pêşkêşî we bike.