Hêjayan;
Roja yekşema borî (16.09.2012) li navenda Mêrsînê, ez rastî êrîşeke xedar û hovane hatim ku bê virde-wêde qest can bû!
Di sêrî de ez vê êrîşa dirinde, van êrîşkarên kirêt û bi çi rengî dibe bila bibe ew ên ku ez kirim hedefa vê êrîşê, bi tundî û bi hemû hêrsa xwe şermezar dikim!
Ligel hin êş û birînan ez baş im û sihet û tenduristiya min niha li cih e.
Ez heme;
Hew mirov im, kurd im, û muzîkjen-helbestkar im;
ji bo hebûn û jiyînê, ji bilî peyv û stran û helbestên min tu rê-rêbaz û tiştekî min ê din tune!
Her wiha tu hesabên min ên erzan û tu dan û standinên min ên nepak jî tune.
Nirxên min ên mirovane û nirxên min ên kurdewar jî, ji bilî “xweşî, hezkirin û pûtepêdanê” tu tişta nepak hînî min nekirin!
Van êrîşkarên nemirov gotin; “Em bi navê derdoreke kurd li Mêrsînê vê êrîşê dikin!”
Ev gotin, gotina wan e!
Navê vê “derdor”ê jî li cem min veşarî ye!
5 roj qediyan, ez li bendê bûm û min xwest ji vê “derdor”ê rayedar an jî berpirsek rabe û min û derdora min û malbata min di vê derbarê de serwext bike.
Mixabin, hê do di varî de biçûk be jî kêm-zêde hin pêşketin çêbûn.
Û heta 2-3 rojan jî, ez li bendê me (û bi hêvî me!) ku ev mesele bi temamî safî bibe.
Her wiha;
Min heta vê gavê jî giliyê van êrîşkarên kirêt nekiriye û ku rewş bi awayekî KURMANCIYANE ber bi zelaliyê ve biçe jî ez ê gilî nakim.
Ev gilînekirin ne ji ber tirs û qelsiya min a ji hinekan e, na.. lê wekî pêşiyên min gotine; “mirov kûçikî dide xatirê xwedî!”
Lê axir, (ku ez nexwazim bikar bînim jî) divê bê zanîn ku ev mafê min ê gilîkirinê jî veşirtiye!
Ez ji sêrî de difikirim ku ev êrîş “karê jîrikan” e! Hê jî wiha hêvî dikim û dixwazim wiha jî yeqîn bikim;
Lew hê mesele bi temamî çareser nebûye û negihaye encameke pak!
Ji hêla din ve; encama vê êrîşa kirêt û qirrêj ji bo min çi dibe bila bibe,
divê ev êrîşkarên dirrinde û nemirov baş û baş bizanibin ku ew bi ser neketin û heta têk çûn!
Lê û belê ez heme..û ji her wextê bêtir û têkûztir ez ê domdariyê li kar û barê xwe yê hunerî bikim!
Têbiniya dilxweşiyê; spasdarî û malavayiyê dikim bo silav û dilgermiya hemû heval û hogiran, û hemû sazî û derdorên ku gelekî ziravbihîstyar tevgeriyan, xwedîtî li min û vê meseleyê kirin!
Bi rêz û xweşî
***
Têbiniya Diyarnameyê: Piştî em pê hesiyabûn ku êrîşê hevalê me Yeqîn H. (Yekîn Olmez) kirine, em hem li cem wî bûn, hem jî me nûçeyek* li ser çêkir. Me jêre got ku tu kengê bixwazî tiştinan li ser rewşê bibêjî, binivîsî, emê biweşînin. Pêşî nexwest, lê niha ji ber agahiyek nû hebû wî jî ev rêzên jorîn nivîsîne û ji me re şandine. Wî got, “hûn çawa bixwazin wisa bikar bînin.”
Ji ber karê wî ev demeke dirêj bû quncikê Yeqîn H. vala mabû. Me jî xwest em vê daxuyaniya wî di qincikê wî de biweşînin.
Bi hêviya ku kesên ketine nava ev hewldana hovane werin jê lêborînê bixwazin.
*Nûçeya eleqedar: Hin kesan êrîşî Yeqîn H. kirin