Almanya

Li bajarê Dusseldofa Almanyayê li dor sed hezar kesî di mîtînga ji bo piştgiriya Kobanî de hat ba hev. Hevserokê PYD'ê Salih Muslim got: "Heta ku Arîn Mîrxanên me hebin Kobanî dê li ser piyan be."

Navenda Civaka Demokratîk a Kurd li Almanyayê (Nave-Dem) û PYD'ê ji bo piştgiriya Kobanî li Dusseldofê mîtînggek li dar xist, partî û rêxistinên AABK, MLKP, FKE, FEDA, PÇDK, CİK, PJAK, Partizan, ATİK, YDG, ODP, MLPD, Sol Parti, TİKB, Rote Aksiyon û DİDF jî di nav de bi dehan saziyan piştgirî da mîtîngê.

Ji serê sibê de gel bi diruşma "Ji Şengalê heta Kobanî" meşiya. Korteja mîtîngê bi qasî sê kîlometreyan dirêj bû. Dema gel gihîşt qasê hejmara gel gihîşt sed hezarî. Di mîtîngê de wêneyên Ocalan, alên PKK, PYD û gelek rêxistinên din hatin vekirin.

Gel diruşma "Bijî berxwedana Kobanê", "Bijî YPG",  "DAÎŞ ji Kurdistanê bicehime" bilind kirin. Axaftina destpêkê ya mîtîngê hevseroka NAV-DEM'ê Yuksel Koç kir û got ku kurdên li Ewropayê li ser piyan e û ev yek lê zêde kir: "Em silavên ji bo şervanên YPG û YPJ'ê dişînin."

Hevserokê PYD'ê Salih Muslim bi çepik û tilîliyan derket ser dikê, silav li gelê ku bi wan re di nav piştgiriyê de ne û wisa got: "Berxwedana ku îro li Kobanî li dar dikeve li ser navê mirovahiyê li dar dikeve. Bi saya berxwedana Kobanî hemû kurd hatine cem hev. Ev yek serketineke dîrokî ye."

Muslim bal kişand ser berxwedana kurdên Bakur û kurdên li Ewropayê û got: "Bi saya vê berxwedanê hêzên YPG û YPJ şer dikin. Divê ez bi awayekî eşkere vê bibêjim ku li Kobanî tu şervanekî yan rêveberekî me bi paş ve venekişiya ye û hemû di nav têkoşînê de ne. Herkes bila vê yekê baş bizane ku Kobanî têk naçe. Îro hemû rêveberiya Kobanî li eniyê şer dike. Yê me keç û kurên me yên wekî Arîn Mirxan hene. Wekî Rêber Apo rêberekî me heye. Kobanî îro 27 roj in ber xwe dide. Emê heta dilopa xwîna xwe ya dawî ber xwe bidin. Ger rojekê em têk herin jî dê ev yek ne eyba me be. Ji ber ku em ber xwe didin. Ew eyb dê yên ku soza alîkariyê dane me û alîkarî nekirine be. Dê bibe eyba dewletên dinyayê û eyba mirovahiyê. Bila her kes vê yekê baş bizane."

Enwer Muslim: Kobanî têk naçe

Hevserokê Kantona Kobanî Enver Muslim jî bi telefonê beşdarî mîtîngê bû û got ku Kobanî dê qet têk neçe.Muslim wisa got: "Ev çeteyên DAIŞ'ê bi çekên giran ku ji Misûl û Reqayê anîne dixwazin kurdan qetil bikin. Lê dê nikaribin. Di dîroka Kurdistan û Rojhilata Navîn de yekemîn car kurd di nav yekîtiyê de ber xwe didin. Kurdan bi vê berxwedanê diyar kir ku koletiyê qebûl nakin. Niha ez agahiyeke bidim we: Li aliyê rojhilatê Kobanî hêzên YPG û YPJ'ê çeteyên DAIŞ'ê xistin kêmînê. Li wir miriyên wan hene. Kobanî têk naçe û dê qet têk neçe. Herkes bila vê yekê baş bizane."

Her wiha Muslim bang li daya giştî ya Ewropayê û dinyayê kir û piştgirî xwest. Konseya Rêveberiya KCK'ê jî peyameke nivîskî şand ji bo mîtîngê û got: "Roj roja yekîtiyê ye. Azadî bi yekîtiyê tê. Emê bi vî awayî li dijî çeteyên DAIŞ'ê bikin û rê nedin wan. Gelê me bi têkoşîna ku meşandiye ev yek çespandiye. Îro jî bi vê zanebûnê dê li kolanan be."