Diyarname
Nivîskar Helîm Yusiv ji Avestayê veqetiya û beşdarî weşanxaneyeke nû bû. Romana wî ya nû jî dertê.

Pirtûkên nivîskarê malpera me Helîm Yûsiv ji salên 90’î ve têne weşandin. Li Bakur yekem pirtûka Yûsiv di pûşpera 1996'an de bi navê "Mirî Ranazin" ji Weşanên Avestayê derketibû. Piştî wê bi rêzê "Mêrê Avis" (1997), "Jinên Qatên Bilind" (1998), "Oluler Uyumaz" (Wergera Mirî Ranazin ku ji aliyê Rahmî Batur ve hate wergerandin / 1998), "Sobarto" (1999), "Memê bê Zîn" (2003) û "Tirsa bê Diran" (2006. Ev roman ji aliyê Rahmi Batur ve ji bo tirkî jî hate wergerandin û di 2008’an de ji Weşanên Evrenselê derket) ji Wexanên Avestayê derketibû. Û niha nivîskarê malpera me Helîm Yûsiv ji Weşanên Avestayê veqetiya. Yûsiv beşdarî Weşanên Lîsê bû û êdî pirtûkên wî dê ji Lîsê derkevin. Wekî yekem pirtûk jî dê romana Helîm Yûsiv derkeve.

Navê romana nû ya Helîm Yûsiv "Gava ku masî tî dibin" e. Berê bi navê “Sobarto” û “Tirsa bê Diran” du romanên Yûsiv derketibûn. Di romana wî ya sêyem “Gava masî tî dibin” de Masî navê kesê sereke yê romanê ye. Masî xortekî sêwî û bitenêmayî ye li binxetê, dixwîne. Ew û kûçikê xwe yê reş Bozo bi hev re dijîn. Masî destpêkê dikeve bin bandora ramanên oldariyê, pişt re jî yê çepgiriyê...Bi naskirina keçeke serxetî re ku bi mêvandarî li binxetê ye jiyana wî serbinoyî hev dibe. Keçik diçe, lê evîneke bê çare li pey xwe dihêle. Û piştî vê yekê dê leheng bide ser şopê, dê bikeve nava şerê giran û dê bibe keseke din...

Xwendevan di pirtûkê de dê ji devê mar, kûçik, deriyê hesinî, nivişt, kevirekî ser sînor, pênûsa ku di binê çenteyê wî de, pirtûka ku nehatiye xwendin, şûtik û gelek tiştên guhdarî çîroka Masî bikin.

Li gor agahiyên ku me ji Weşanên Lîsê girtin romana Yûsiv dê du mehên din, di serê meha rezberê de bigihîje ber destê xwendevanan.

Helîm Yûsiv di sala 1967’an de li Amûdê hatiye dinê. Wî li Zanîngeha Helebê Fakulteya Hiqûqê xwendiye û ji  sala 2000’î ve li Almanyayê dijî. Yûsiv ku heta niha di gelek kovar, rojname û malperan de nivîsên wî derketine, niha wekî qunciknivîskar di Diyarnameyê de dinivîse û her wiha ji bo Roj TV jî “Gava sêyemîn” bernameyeke amade û pêşkêş dike.

Wekî noteke: Nivîskar Helîm Yûsiv serê vê salê piştî ku çend nivîsên rexneyî li ser weşangeriya kurdî û weşanên kurdan di Diyarnameyê* de nivîsand û hin rexne arasteyî weşanxaneyan kir, di navbera wî û weşanxaneya wî Avestayê de pirsgirêk derket. Piştî hin axaftina Yûsiv û Weşanên Avestayê xatir ji hev xwest û ji hev veqetiyan.

*Ji bo kesên eleqedar nivîsên Helîm Yûsiv ên li ser weşanxaneyan:

- Cînayetên dijî pirtûka kurdî, Cînayetên weşangeran-1

- Rexne, ev cînayeta mezin -2

- Ez û Weşanxaneya Avesta - 1

- Ez û Weşanxaneya Avesta – 2

- Cînayetên dijî pirtûka kurdî, cînayetên nivîskaran- 3

- Xweşiktirîn tiştê li jiyanê

***

Bi şertê nîşandayîna çavkaniyê her kes dikare nûçe û nivîsên Diyarnameyê bikar bîne. Bêyî nîşandayîna çavkaniyê bikaranîna nûçe û nivîsên Diyarnameyê qedexe ye.