QAMIŞLO
Rêveberiya Giştî ya Polîsên Trafîkê ya herêma Cizîrê ji bo ewlehiya ajokar û welatiyan 22 qanûn derxistin.

Bi rasthatina roja cîhanê ya trafîkê 4'ê Gulanê Rêveberiya Giştî ya Trafîkê ya herêma Cizîrê li Navenda Rêveberiya Giştî ya Asayîşê ya li taxa Qudûrbeg a bajarê Qamişlo civîneke çapemeniyê lidar xist.

Di cîvînê de 22 biryarên trafîkê hatin eşkerekirin û ji bo qezayên tirafîkê pêk neyên, ji hemû ajokaran hate xwestin ku li gorî van biryaran tevbigerin.

Di civîna çapemeniyê de Endamên Rêveberiya Giştî ya Polîsên Trafîkê Mihemd Umer, Sarim Ehmed û Baran Elî amade bûn. biryar ji bo dezgehên çapemeniyê ji aliyê Mihemed Umer hatin xwendin.

Qanûnên ku hatin xwendin ev in:

1-      Divê xwediyên tirimpêlên neqeydkirî li navendên veguhestinê herî dereng heta 20'ê gulanê tirimpêlên xwe qeyd bikin.

2-      Divê hemû tiştên ku hundir û derveyî tirimpêlan vedişîrin ên wekî reşkirina camê bêne rakirin.

3-      Divê numreyên tabloyên tirimpêlan xuyakirî bin.

4-      Divê alavên sereke yên tirimpêlan li Rêveberiya Veguhestinê bêne qeydkirin.

5-      Divê ajokar li gorî rênîşanên diyarkirî ajokariyê bikin.

6-      Divê tirimpêl li cihê ku tevgera ajokariyê asteng dike neyê rawestandin.

7-      Divê ajokar li gorî tabloyên trafîkê tev bigerin.

8-      Divê li gorî sîstema trafîkê ajokar li derdora çerxereyan tev bigerin.

9-      Divê li deverên wekî pir, zîvirandin lezbûna tirimplan kêm be.

10-   Divê di navbera tirimpêlan de valahiya ewlehiyê hebe û di hevînê de du qat be.

11-   Divê ajokar kembera ewlehiyê girêbide.

12-   Divê ajokar alavên vemirandina agir û amûrên sererastkirinê bi xwe re rakin.

13-   Nabe ajokarî bi awayekî bêberpirsiyar bête kirin.

14-   Nabe ku tu kes tirimpêlên xwe bilez buxşînin.

15-   Divê xweşikbûna tirimpêlê bê parastin.

16-   Divê ajokar lempeyên tirimpêlan ên rastlihevhatinê baş bikar bînin û li gorî nîşanan tev bigerin.

17-   Nabe tirimpêl di nîvê kolanê de bê rawestandin.

18-   Divê telefona destan di dema ajotinê de neyê bikaranîn.

19-   Nabe ku tu kes ji tirimpêlan çopê baxêjin ser kolanan.

20-   Divê ajokar li gorî polîsên trafîkê tev bigerin.

21-   Nabe ku tirimpêlên mezin (Kamyon) ji saet 7'ê sibê heta 10'ê şevê derbasî hundirê bajaran bibin.

22-   Divê patos dema ku di riyên giştî re derbas dibin devikên wan bi tirimpêlan bêne veguhestin ji bo ku astengiyê di çûn û hatinê de çêdikin.

Mihemed Umer destnîşan kir ku ji bo birêxistinkirina çûn û hatina tirimpêlan di nava bajaran de û di riyan re, dê Rêveberiya Giştî ya Polîsên Trafkê bi hemû derfetên xwe tevbigere û wiha got: "Ji ber ku ev biryar ji bo ewlehiya welatî û ajokaran e, divê hemû ajokar li gorî van tevbigerin."

Civîna bi bersivdayîna pirsên rojnamevanan bi dawî bû.