HEWLÊR (DÎHA) 

Rojnameya Hawlatî ya ku li Herêma Kurdistanê rojane tê çap û belavkirin, belgeneyeke nepenî li ser kolandina xendekan belav kir. Li gor wê belgeyê, xendekên di navbera Rojava û Herêma Kurdistanê de bi peymanekî di navbera Partiya Demokrat a Kurdistanê (PDK) û MÎT’a Tirkiyê de hatiye kolandin.

Rojnameya Hawlatî di hêjmara xwe ya îro de nûçeyek bi manşeta: “Li gor belgenameyeke nehênî ya Wezareta Derve ya Tirkiyê ji bo balyozxaneya welatê xwe ya li Hewlêrê: PDK û MÎT li ser kolandina xengan rêkeftine” belav kir. Di despêka nûçeyê de wiha tê gotin: “Tirkiye wê ji bo bihêzkirina PDK’ê ya li hundir û derveyî Herêma Kurdistanê kar bike. Ev jî li gor belgenameyeke veşartî ya wezareta derve ya Tirkiyê ye ku di nav de rêkeftina MÎT û PDK’ê ya li ser kolandina xendekan navbera Rojava û Herêma Kurdistanê de berdewam bin.”

Hawlatî di berdewama nûçeya xwe de radigihîne ku kopiyeke wê belgeyê ketiye destê wan, pileya wê ya nepenî (veşartî) heye û di bin navnîşana ‘Çend biryar ji bo bihêzkirin û xwe cih kirina Tirkiyeyê li Herêma Kurdistanê’ û bi awayekî ‘Taybet ji bo cihê peywendîdar’ pêşkêşî balyozxaneya Tirkiyeyê ya li Hewlêrê hatiye kirin. Hawlatî radigihîne ku tevî dîroka şandina wê belgeyê ne diyar e, lê naveroka wê ron û eşkere ye.

Li gor wê belgeyê, misteşarê MÎT’ê Hakan Fîdan li Hewlêrê ligel berpirsên PDK’ê civiyaye û bi rêya komîteya dualî ve 3’ê biryar girtine. Rojname behsa xalên wê biryarê dike; “Me di civîna sibatê de biryar girt ku di kolandina xendekên li ser sînor de berdewam bin. Ji bo em bi rêya wan xendekan rêya kesên rûbirûyê Tirkiyê dibin bigirin û ger pêwîst jî bike, di navê de mûdaxele bikin.”

Hawlatî radigihîne ku li gor wê belgeyê xalekî din jî taybet li ser wê yekê ye ku zextê li Yekîneyên Parastina Gel (YPG) bikin û li sînorê “Rêveberiya bakûrê Iraqê (Herêma Kurdistanê) û Sûriye hêzek bi navê Cebhet el-Nusra heye û hewl bê dayîn ku xebatên wan ên ji bo baskê leşkerî were zêdekirin û hêsanîkirin.”

Divê YNK were lewazkirin. 

Li gor heman rojnameyê, di xala dawî de tê gotin ku divê PDK’ê têbigihînin ku partiyên kurdî yên li herêmê nabe bi ti awayî li dijî neteweya Tirk bin û bi taybet jî YNK; “Hikûmeta ku sibe were avakirin jî, pêwîste em di nav de wisa li YNK’ê bikin ku bikeve di rewşeke wisa de nekare dijberiya nirxên Tirkiyê bike.”

Di beşek din a wê belgeyê de wiha tê gotin: “Li bakurê Iraqê hinek tiştên girîng hene, me bi rêya dewleta xwe û di çarçoveya nexşerêya me de ye. Despêkê bihêzkirina partiya Barzanî li navxwe û derve. Ligel vê yekê jî partî, aliyên siyasî û muxalifeta ku li dijî nirxên neteweya Tirkiyeyê yên li Iraq û Sûriyê werin bê bandorkirin.”

Di wê belgenameyê de tê eşkere kirin ev yek wê diyar bike ku karê balyozxaneya Tirkiyeyê ya li Hewlêrê çalak e û wiha tê gotin: “Rêkeftinên me yên ligel partiya Barzanî, derfetê pêşketina xebata me ya siyasî ya li herêmê (Herêma Kurdistanê) pêş dixe.” 

Li ser rewşa Sûriyê jî di belgeyê de wiha tê gotin: “Rêveberiya bakurê Iraqê bi awayekî giştî û aloziyên Sûriye bandorekî nerênî li ser kurdan dike. Ev jî armanca me ya yekemîn e.”

Di belgeyê de derbarê Herêma Rojava de jî wiha tê gotin: “Li wê derê hinek rêveberiyên nêzî PKK’ê hene. Divê di warê dîplomasî û sîxuriyê de bibin armanc û bên lawazkirin. Wan îdareyan (mebest kantona Efrîn, Qamişlo û Kobanê) li navxwe û derve, em bi destlêwerdanê lawaz bikin û ji nav bibin. Ger çi aliyek jî piştgiriya wan bike, em ji nav bibin.”

Rojnameya Hawlatî di dawiya nûçeya xwe de radigihîne ku wan nekarîne bi temamî rastiya wê belgeyê piştrast bikin û tevî ku ji gelek aliyan ve hewldane.