Agirî
Li Şaredarê Panosê yê BDP’yî Yusuf Yilmaz bi îdîaya endamê rêxistinê ye û li dijî polîsan derketiye 7 sal û 3 meh cezayê hepsê lê hate birîn. Yilmaz diyar kir ku cezaya hatiye birîn berdewama operasyonên siyasî ye û got; “ceza ne hiqûqî ye.”

Rûniştina doza der heqê Şaredarê Patnosê Yusuf Yilmaz de bi hinceta ku di sala 2011'an de tevlî daxuyaniya ji bo gerîlayên li bejahiya Qilabana Şirnexê jiyana xwe ji dest dabûn bûye hatibû vekirin li 2'yemîn Dadgeha Cezayê Giran a Erziromê dom kir. Di danişîna biryarê de parêzerê Yilmaz amade bû.

Parêzerê Yilmaz Bahattîn Firat got ku îdîayên ku têne kirin bê bingehin lê di encamê de Heyeta dadgehê 6 sal û 3 meh; bi îdîaya dijî polîsan derketiye jî salekê ceza li Yilmaz birî.

Yilmaz li hemberî cezaya lê hatiye birîn bertek nîşan da got; "Hikumeta AKP'ê şaredarên BDP'ê wekî hedef nîşan dide. Hikumet bi van pêkanînan kelebçe li vîna kurdan dixe. Çawa operasyonên siyasî û leşkerî li çiya û Kurdistanê dimeşîne heman operasyonan jî li ser şaredariyên me dimeşîne. Em li vê derê ji bo gelê xwe dixebitin. Ew vê yekê tehemul nakin. Bi girtina siyasetmedarên kurd re riya çiya nîşanî me didin. Ez li vê derê şaredar im. Di daxuyaniya ku ez tevlî bûm de tu bûyer derneketin. Tu kevir nehatine avêtin û cam nehatine şikênandin. Ji bo şaredar bên rawestandin îdîanameyeke bi vî rengî amade kirine. Em ê li ber xwe bidin û em ê xwe biparêzin."