DiyarName.Com

Bi pêşengiya KNK'ê 19 partiyên siyasî û rêxistinên civakî yên sivîl ên kurd, bi civîneke çapemeniyê bal kişandin ser gir

SILÊMANÎ

Bi pêşengiya KNK'ê 19 partiyên siyasî û rêxistinên civakî yên sivîl ên kurd, bi civîneke çapemeniyê bal kişandin ser girîngiya rojavayê Kurdistanê ji bo azadiya tevahiya Kurdistanê û destnîşan kirin ku ji bo xurtkirina destketiyên Rojavayê Kurdistanê banga kombûna Kongreya Neteweyî ya Kurd dûbare kirin.

KNK'ê, bi diruşma "Piştgiriya Neteweyî ji bo Rojavayê Kurdistanê", di 10'emîn salvegera komkujî û raperîna Qamişlo ya 12'ê Adara 2004'an de, civîneke çapemeniyê lidar xist.

Civîna çapemeniyê bi beşdariya 19 partiyên siyasî û rêxistinên civakî yên sivîl îro li Salona Heme Mele Kerîm a Pirtûkxaneya Giştî ya Silêmanî hat lidarxistin.

Daxuyanî li ser navê KNK'ê ji aliyê Mihemed Emîn Pencewînî ve hat dayîn. Her wiha Wezîrê Karên Devre yê Kantona Cizîrê Salih Gedo û Serokê Partiya Çep a Kurd li Sûriyeyê Mihemedê Mûsê li civînê axivîn.

Di daxuyaniyê de hat bibîrxistin ku di encama êrîşa rejîma Sûriyeyê ya 12'ê Adara 2004'an de li Qamişlo bi dehan mirov hatin qetilkirin, bi sedan kes birîndar bûn, bi hezaran kes jî hatin girtin, rastî îşkenceyê hatin. Di daxuyaniyê wiha hat gotin: "Em wekî partiyên siyasî, rêxistinên civakî û gel di şexsê şehîdên komkujiya Qamişlo de şehîdên Rojava bi hurmet bibîr tînin û gelê me yê Rojava ku ji 2004'an ve heta niha serî hilda ye silav dikin."

Hat gotin ku tevî rojavayê Kurdistanê ji aliyê erdnîgariyê ve parçeyê herî biçûk ê Kurdistanê ye jî bi berxwedana xwe ya efsanewî ya di du salên dawî de, ne tenê li rojeva Kurdistanê, di rojeva siyaseta navneteweyî de jî cih girtiye.

Di daxuyaniyê de hat diyarkirin ku li gel êrîşên komên çete û siyaseta ambargoyê jî gelên li rojavayê Kurdistanê serî li ber zaliman netewandine û li dijî her cure êrîşan li ber xwe dane.

'BIDESTXISTINA AZADIYA ROJAVA BI DESTXISTINA AZADIYA KURDISTANÊ YE'

Di dewama daxuyaniyê de wiha hat gotin:

"Em wekî hêzên Kurdistanî yên welatparêz bi rih û fikrên xwe her tim li cem gelê xwe yê Rojava ne, ku şoreşê pêş dixe. Bi desxistina azadiya xwe ya Rojava bi destxistina azadiya Kurdistanê ye. Li Rojava gelê me rastiya Rojhilata Navîn nirxand û gavên dîrokî yên çareseriya rast afirand. Kurdistana Rojava di çareseriya xwe de bi hembêzkirina gel û baweriyên ereb, asûrî-sûryanî, keldanî, çeçen, ermenî, êzdî, elewî, mesîhî û sunî rê li ber siyaseta li ser dijminahiya gelan a li Rojhilata Navîn hatiye sazkirin girt. Ji ber vê yekê, çareseriya Kurdistana Rojava ji bo Rojhilata Navîn şoreşeke mînak e."

Di daxuyaniya partiyên siyasî û rêxistinên civakî yên sivîl de hat destnîşankirin ku gelê rojavayê Kurdistanê mafê diyarkirina çarenûsa xwe ya Neteweyên Yekbûyî li gorî rastiya xwe hûnandiye û sîstema kantonan hilbijartiye.

'ROJAVA DESTKETIYEK DI SER PARTIYAN RE YE'

Di vê der barê de wiha hate gotin: "Em wekî hêzên welatparêz ên kurdistanî modela diyarkirina çarenûsa xwe bi hurmet dibînin û ji bo serketina wê em diyar dikin, ku emê xizmetên xwe pêşkêş bikin. Di demokratîkbûyîna Sûrî de jî têkoşîna siyasî û neteweyî ya gelê me ji bo Kurdistana Rojava bi afirandina çareseriya xwe û di serî de saziyên kurd têkoşîna qebûlkirina vê yekê ji aliyê Rejîma Sûrî û hêzên navneteweyî ve bi awayekî fermî, ji bo zêdetir xwîn nerije helwesteke girîng e.

Ji bo daxwaza azadiyê ya gelê me yê Rojava bi ser bikeve, polîtîkaya yekîtiya neteweyî ya kurd, ku li dora Rojava bûye yek, îro xwedî girîngiyeke mezin e. Zêdetir berpirsiyarî dikeve ser milê destketiya me ya herî mezin a neteweyî û dîrokî Başûrê Kurdistanê. Rojava destketiyeke di ser partiyan re ye. Ji ber vê yekê, qurbankirina Rojava ji berjewendiyên teng ên polîtîk re berevajî siyaseta yekîtiya neteweyî ye. Li her parçeyên Kurdistanê pêdiviya me bi siyaseteke yekîtiya neteweyî heye, ku her destketiyên gelê me yê bi berxwedanê hatine bidestxistin, wekî destketiyên xwe bibîne û pê ser bilind be."

BANGA KOMBÛNA KONGREYA NETEWEYÎ

Di daxuyaniyê de li ser girîngiya Kongreya Neteweyî ya Kurd û banga ji bo kombûna kongreyê careke din hat dubarekirin.

Di dewama daxuyaniyê de hat ragihandin ku serketina gelê Kurdistanê ya bi misogerî deynê hemû hêzên siyasî ji bo cangoriyên Kurdistanê ye û wiha hat domkirin: "Di meha Adarê de çi li Qamişlo, çi li Helebçe û çi di raperînên li Başûrê Kurdistanê de mirovên me yên şehîd ketin, Kurdistaneke azad xeyal kirin û ji bo vê yekê şer kirin. Di veguherîna rastiya Rojhilata Navîn de ji bo em çarenûsa xwe diyar bikin derfetên me ji her rojê zêdetir îro hene. Ji bo vê yekê jî ya ku wê me xurt û bi hêz bike, polîtîkayên me yên yekîtiya neteweyî ne. Ji bo li Rojava em vê yekê têxin meriyetê em bi berpirsiyariyeke dîrokî re rû bi rû ne. Em çiqasî li dora Rojava bigihin hev, wê Rojava ew qasî zû bi serkeve."

‘DIVÊ EM LI ROJA ROJAVA BICIVIN’

Li ser navê Kantonên Rojavayê Kurdistanê Salih Gedo û ji Partiya Çep a Kurd li Sûriyeyê Mihemedê Mûsê axivîn.

Mûsê da xuyakirin ku divê ji bo serketina şoreşa Rojava her kes beşdar bibin û rexne li wan hêzên ku bi hincetan beşdar nabin kir. Mûsê got: "Bila her kes were li ser axa me têbikoşe, bi gel re bibe yek. Deriyê me ji bo her kesî vekirî ye. Em rexneyên li ser bingeha bahaneyan qebûl nakin."

Mûsê da zanîn ku pêwîst e hikumeta Başûrê Kurdistanê destekê bide şoreşa Rojava û got: "Ji bo serketina vê projeyê hewceye parçeyên din şoreşa Rojava wekî şoreşa xwe biparêzin. Li Rojava niha rewşeke krîtîk heye û divê li dora Rojava yekîtiya neteweyî pêk were."

Salih Gedo jî da zanîn ku kantonên li Rojavayê Kurdistanê gelekî baş dixebitin û destnîşan kir ku bi îlana kantonan re gel moraleke mezin wegirtiye. Gedo got: "Vê yekê jî careke din raxist pêş çavan ku çareseriya herî rast kanton in."

Partî rêxistinên civakî yên sivîl ên mora xwe avêtine binê daxuyaniyê:

Bizûtinewey Gorran

Yekîtiya Niştimanî ya Kurdistanê (YNK)

Yekgirtûy Îslamiy Kurdistan (YÎK)

Partiya Demokrasî û Aşîtî (BDP)

Hizbî Zahmetkaşanê Kurdistan

Bizûtinewey Îslamiy Kurdistan

Partî Çareserî Dîmukratî Kurdistan (PÇDK)

Hizbî Ayinde Kurdistan

Partiya Jiyana Azad a Kurdîstan (PJAK)

Partiya Rizgariya Kurdistan

Yekêtiy Neteweyiy Dîmukratî Kurdistan (YNDK)