Amed
Serokê ÎHD'ya Amedê Muharrem Erbey got ku li Amedê di demên dawî de her diçe bûyerên revandina zarokan zêde dibin.

Serokê ÎHD'ya Amedê Muharrem Erbey got ku li Amedê di demên dawî de her diçe bûyerên revandina zarokan zêde dibin û wiha got: "Zarokên ku têne revandin, herî zêde li Antalya, Îzmîr û Stenbolê, di mercên xirab de dijîn, dibin tilyakêş, dizî û gelek sûcên din bi wan didin kirin."

Şaxa ÎHD'ê ya Amedê, ji ber ku malbata xebatkarê Firat Dagitimê B.A. (15) yê di 15'ê pûşperê de winda bûye serî li wan da, li avahiya komeleyê daxuyaniyek da çapemeniyê. Serokê ÎHD'eya Amedê Muharrem Erbey ku daxuyanî xwend, balkişand ser rewşa zarokên ku li Amedê winda bûne. Erbey, got ku bavê B. A. Şehmus Altuntaş der barê mijarê de serî li wan daye û wiha dom kir: "Di hevdîtinên bi telefonê hatine kirin de tê dîtin ku hejmara zarokên hatine windakirin, derdora 10'an e. Zarokên ku têne revandin, herî zêde li Antalya, Îzmîr û Stenbolê, di mercên xirab de dijîn, dibin tiryakêş, dizî û gelek sûcên din bi wan didin kirin."

Erbey da zanîn ku divê hêzên ewlehiyê, li otogaran, balafirgehan kontrolên xwe zêdetir bikin. Erbey, diyar kir ku divê nehêlin zarok bêyî malbata xwe, bi tena serê xwe rêwîtî bikin. Erbey, banga bihîstyariyê li rayedaran kir û xwest ku B.A. tavilê bê dîtin. Erbey, wiha got: "Tenê zarok nîn e yê ku tê revandin, pêşeroja me ye jî. Em li pêşeroja xwe xwedî derkevin."

'Yên ku revandin gotin ku kurê min li cem wan e'

Bavê B.A. Şehmus Altuntaş jî diyar kir ku kurê wî di 15'ê hezîranê de wenda bûye û wiha dom kir: "Kurê min li Şirketa Firat Dagitim dixebitî. Me ji wir pirsî, ji xizmên xwe pirsî, xebera tu kesî jê tune. Dawiyê, me bihîst ku hevalek wî yê bi navê Yusuf ew biriye Antalyayê." Altntaş, da zanîn ku bi tevî nimroya Yusuf û hemû agahiyên di destê xwe de, duh serî li qereqolê daye û wiha dom kir: "Min bi telefonê bi wî re hevdîtin çêkir. Pêşî got ku kurê min li cem wî nîne. Lê piştre hevalek din ê Yusuf, got ku kurê min li cem wan e. Ji min re gotin ku wê kurê min bişînin. Lê hê jî min ji kurê xwe tu xeber nestendiye. Ji rayedaran alîkarî dixwazim."

Ji DÎHA'yê hatiye girtin