Diyarname
Kovara sê mehane Nûbihar bi hejmara xwe ya 176’an li pêşberî xwendevanên xwe ye.
Nûbiharê niha hejmara xwe ya havîna 2026’an pêşkêşî xwendevanên xwe kir. Edîtorê kovarê Suleyman Çevik diyar dike ku van demên dawî gelek nivîs ji bo Nûbiharê têne şandine û wisa lê zêde dike; “Çi helbest, çi pexşan ji berê bêhtir nivîs jî têne Nûbiharê. Ev eleqe helbet me pir kêfxweş dike. Rûpelên kovaran ji bo nivîskar û şairên ciwan, meydana tecrubê ye. Kovar bi kar û xebata xwe karekî zehmet e. Wekî pirtûkan nîn e; her nivîs û helbestek bi serê xwe mijarek e. Hûn mecbûr in di navbera nivîskar, mijar û cureyan de muwazeneyê çêbikin.”
‘QELEM’ DI EDEBIYATA KURDÎ DE
Kovarê di hejmarên xwe yên dawî de dosya amade dikirin lê di vê hejmarê de dosya amade nekiriye, nivîsên serbest hatine weşandin. Ji van, M. Zahir Ertekin li ser meseleya “Di edebiyata kurmancî û soranî de qelemname” sekiniye. Di edebiyata wêjeya klasîk de qelem ku rêyeke girîng a diyalogê ye, niha bûye mijara Ertekîn. Nivîskar û lêkolîner Erketîn ji edebiyata kurmancî 6 mînak, ji ya soranî jî 8 mînak vekolandiye.
PORTREYA RABÎA XANIMÊ
Nivîskar û lêkolîner Nihat Gultekîn berê xwe daye berxwedana Agirî. Niha ku 100 saliya Berxwedana Agiriyê ye, Gultekîn li ser jiyana Rabîa Xanimê sekiniye. Rabîa Xanim ku jina yek ji pêşengên serhildanê Biroyê Heskê Telî bû beşdarî berxwedanê bûye û xwedî karakterek taybet e. Gultekîn ew derxistiye pêş xwendevanan û carek din ew bibîr aniye.
Ji hevpeyvînên vê mehê, rojnameger Salih Kevirbirî ligel Serokê Federasyona Kurdên Sovyeta Berê, Şêx Remezanê Seyîd axiviye.
YÊN KU KED DANE VÊ HEJMARÊ
Rojbîn Ozkan, Mustafa Ertaş, Îbrahîm Bulak, Bedirhan Epozdemir, Mustafa Gokkan, Solîn Peyman, Mehmet Bor, Felat Dilgeş, Sabri Akbel, Osman Aytar, Ayşegul Kizilkaya, Faik Ocal, Miradxan Şemzînî, Dildar Zeynel, Abdulaziz Kan, Xelîl Duhokî û Lokman Polat bi çîrok, lêkolîn û nivîsên xwe yên cur bi cur ked dane vê hejmara Nûbiharê.
Her wiha di vê hejmarê de helbestên van helbestvanan hatine weşandin: Berken Bereh, Îrfan Amîda, Hafizê Şîrazî (werger: Hayrullah Acar), Robert Frost (werger: Rizgar Elegez), Esra Sadikoglu, Sidîq Gorican, Kevok Mizgîn, Xelîl Îbrahîm Banûkî, Merve Şivan, Kevnarî, Xewneroje, Amîne Pîrozxan, Cahit Zarifoglu (werger: Şahin Eroglu), Bamed Serdar, MKU Zirkîbeşîran, Hiwa Kadir (werger: Dilovan Alî) û Dogan Sancak.
Ji bo têkilî:
0212- 519 00 09
info@nubihar.com
**********
Bi şertê nîşandayîna çavkaniyê her kes dikare nûçe, nivîs û fotoyên Diyarnameyê bikar bîne. Bêyî nîşandayîna çavkaniyê bikaranîna nûçe, nivîs û fotoyên Diyarnameyê qedexe ye.