Diyarname

Hunermend Harun Elkî dawiya vê hefteyê konsereke pêşkêş dike. Êvara 5’ê mehê ew dê stranên xwe pêşkêşî muzîkhezan bike.

Konsera Harun Elkî 5’ê mehê li Arsen Lupen a li Taksima Beyogluya Stenbolê li dar dikeve. Konser dê saet 20:00’an de dest pê bike. Piştî pandemîyê Elkî cara yekem e konsereke dide. Di konserê de ewê stranên xwe yê ji albuma “Rev” ku par ji Red Muzîkê derketibû jî pêşkêş bike.

Hunermend Harun Elkî herî dawî meha borî ligel Gulbahar Kavcu û Tara Mamedova klîbek ji bo strana “Meşk” ji ser youtube re belav kiribû û klîb gelek hatibû ecibandin. 

Piştî pandemiyê û rawestina konseran Elkî niha dê bi konsereke nû li pêşberî hezkiriyên xwe be.

Harûn Elkî kî ye?

Harûn Elkî di sala 1975’an de li navçeya Elkê (Beytûşşebab) ya Şirnexê hatiye dinê. Dibistana seretayî, navîn û lîse li Elkê xwendiye. Jiyana xwe ya muzîkê ya profesyonel di sala 1997’an de li Navenda Çanda Mezopotamya (NÇM) ya Edeneyê dest pê kiriye û heman salê wî ligel hevalên xwe koma rocka kurdî ya bi navê “Rewşen” ava kir û di vê komê de solîstî kir. Rewşenê albuma xwe ya yekemîn bi navê “Asê” di sala 2002’yan de dersixt û albuma duyem jî di sala 2005’an de bi navê “Pola Nû” derxist. 

Ew ligel koma xwe heta sala 2011’an li gelek bajaran û welatan derket pêşberî muzîkhezan. Di sala 2011’an de kom belav bû û Harûn Elkî jî ji Edeneyê koçî Stenbolê kir. Piştî belavbûna komê Elkî jîyana xwe ya muzîkê solo berdewam kir û ket nav pêvajoyeke din a afirîneriyê. Wî heta niha du single ji Pasaj Muzîkê bi tirkî derxistin; di sala 2016’an “Tutunma” (Xwegirtin) û 2017’an de jî “Sus” (Hiş). Wî di sala 2019’an de ji Red Muzîkê “Seyrana Gula”, di sala 2020’an de bi Mesut Marangoz re dûetek bi navê “Karwan” derxist. 

Herî dawî di berfanbara 2020’an de ji Red Muzîkê albumekî ji 10 stranan pêk tê ku 9 stran bi kurdî û yek jî bi tirkî bû, bi navê “Rev” derxist. 

Hunermend Elkî, par ligel Gulbahar Kavcu û Tara Mamedova strana “Gule Zerê” xwendibû û klîbeke ji bo wê kişandibû. Piştî ew stran û klîb hatin ecibandin, wan îsal jî meha borî bi navê “Meşk” xebateke pêşkêşî hunerhezan kir.

Konser:

05.12.2021, Yekşem, saet 20.00

Cih: Arsen Lupen Taksim

Ji bo têkilî: 0545 520 4248

Navnîşan: Şehit Muhtar Mah. Mis Sok. No: 15 Kat 4 Taksim, Beyoglu