Diyarname
Şaredarê Bajarê Mezin ê Amedê Osman Baydemîr, Serokê Diyarbekirsporê Çetin Sumer û rêveberên klûbê kirin mêvanê xwe.

Piştî maça bi Bursaspor re di maça Entabspor û Diyarbekirspor de jî diruşmên nijadperestî hatin qîrandin. Her wiha ji ber helwesta hakem a li hemberî Diyarbekirsporê serokê kilûbê Sumer daxuyandibû ku hefteya pêşiya me dê dernekevin maça Galatasaraysporê û ji lîgê vekişin.
Piştî vê daxuyaniyê Serokê Diyarbekirsporê niha bi saziyên sivîl, şaredarî û walîtî re diaxive ku ka ew çi dibêjin.
Serokê Diyarbekirsporê Çetin Sumer û endamên rêveberiyê çûn serdana Şaredar Baydemîr. Di hevdîtinê de Baydemîr xwest ku klûb biryara xwe ya dê dernekevin maça Galatasaray careke din ji ber çavan re derbasbikin. Baydemîr got ku spor û futbol ne cihê pêkêşkirina hestên nijadperestiyê ye û got ku ev yek li dijî rihê sporkariyê ye. Baydemîr êrîşên nijadperestî yên li hemberî Diyarbekirsporê wekî "Êrîşa li nasnameya Diyarbekirê" ye nirxand.
Her wiha Baydemîr piştgiriya xwe ya ji bo Diyarbekirsporê jî eşkere kir.

Di vê navberê de Serokwezîr Recep Tayyip Erdogan di axaftina xwe ya koma Ak Partî de got ku divê Diyarbekirspor ji lîgê venekişe.

Waliyê Diyarbekirê Huseyin Avni Mutlu jî got ku divê Diyarbekirsporê rêya xwe ya di Lîga Super de bidomîne.