Batman
Di pênc salan de kurdan herî zêde navên Bêrîvan, Zîlan, Dîlan, Azad û Hogir li zarokên xwe kirine.
Li gorî îstatîstîkên Midûriyeta Karên Nifûs û Welatîtiya Batmanê, di navbera salên 2002 û 2007'an de navên herî zêde li zarokan hatine kirin Berîvan, Zîlan, Dîlan, Azad û Hogir in.
Îstatîstîka ku ji aliyê Midûriyeta Karên Nufûs û Welatîtiyê ya Batmanê ve hatiye amadekirin nîşan dide ku navên herî zêde li zarokan têne kirin navên kurdî ne.
Li gorî îstatîstîkan li Batmanê navê mêran ê herî zêde tê bi karanîn Mehmet, yê jinan jî Emîne ye. Di navbera salên 1980 û 1990'an de navê Mehmet rekor şikandiye, di nav navên jinan de jî Fatma rekor şikandiye.
Di navbera 1991 û 2007'an de jî, navê Mehmet dor nedaye navên din, di nava navên jinan de vê carê navê Merve derketiye pêş. Di navbera van salan de navên mêran ên herî zêde hatine bikaranîn, Mehmet, Ahmet, Yusuf, Omer û Abdullah e.
Navên jinan yên herî zêde têne bikaranîn jî Emîne, Fatma, Zeynep, Ayşe û Leyla ye.
Di navbera salên 2002 û 2007'an de jî navên herî zêde derketine pêş ên kurdî ne. Navên kurdî yên herî zêde derketine pêş Berîvan, Zîlan, Dîlan, Azad û Hogir in. Li gorî îstatîstîkan di 5 salên dawî de navên kurdî rekor şikandiye.
Ji DÎHA'yê hatiye girtin
Foto: Adem Sonmez (ji www.ademsonmez.com hatiye girtin)