Diyarname
Vê hefteyê fîlmê Guz Sancisi, Despero, Inkheart, Qutiya Pandorayê, Largo Winch hene.
Fîlmê Tomris Giritlioglu "Guz Sancisi" (Êşa Payîzê) li ser bûyerên 5-6'ê rezberê ye. "Qutiya Pandorayê" ya Yeşim Ustaoglu jî li ser nexweşiya Alzheimer e ku her kes dikare bi vê nexweşiyê bikeve. Giritlioglu jî, Ustaoglu jî du derhênerin ku li ser pirsgirêkên civakî fîlman dikişînin. Ji nav fîlmên vê hefteyê em van her du fîlmên wan dikin fîlmên hefteyê û van pêşniyarê we dikin.
Vane hemû fîlmên hefteyê:
Guz Sancisi - Êşa Payîzê (2008)
Derhêner: Tomris Giritlioğlu
Lîstikvan: Murat Yildirim, Beren Saat, Okan Yalabik, Belçim Bilgin Erdogan, Huseyin Avni Danyal, Zeliha Berksoy
Cure: Dram
Di sala 1955'an de kurê axayekî neteweperest Behçet evîndarê keçeke dum Elena dibe û di bin panaromaya bûyerên 6 -7'ê Rezberê û fikrên siyasî de nikeve nav hesaba hundirîn.
Her du evîndarên ku hesaba siyasî ya giran li ser pişta wan e, li ser axa ku dijîn li du aliyên cihê ne.
***
Pandora'nin Kutusu - Qutiya Pandorayê (2008)
Derhêner: Yeşim Ustaoglu
Lîstikvan: Tsilla Chelton, Derya Alabora, Onur Unsal, Ovul Avkiran
Cure: Dram
Senaryoya "Qutiya Pandorayê" Yeşîm Ustaoglu û Sema Kaygusuz bi hev re nivîsandiye. Du xwişk û birekî dema dibihîzin diya wan winda bûye ber bi navçeyeke rojavayê Karadenîzê ve dikevin rê. Fîlm çîroka wan û diya wan nîşan dide.
Her sê aîdê çîna navîn in; her yek li ciheke Stenbolê dijîn, her yek xwedî jiyaneke cihê, xwedî pirsgirêkên cihê ye, ji hev bêagahî ne. Dema ji bo dîtina diya xwe dikevin rê gelek pirsgirêkên wan ku veşarî ne derdikevin holê, ecêbiya pirsgirêk û jiyana wan we nîşan dide, wê demê Qutiya Pandorayê vedibe.
Di heman demê de dibihîzin ku diya wan bi nexweşiya Alzmairê ketiye. Fîlmê ku di heman demê de balê dikişîne ser vê meseleyê heta niha gelek xelat girtine.
***
Murekkep Yurek - Dilê hubrîn - Inkheart (2008)
Derhêner: Iain Softley
Lîstikvan: Brendan Fraser, Andy Serkis, Eliza Bennett, Paul Bettany...
Cure: Malbatî / Macera / Fantastîk
Mo yê bavê Meggie xwedî jîrekiyeke mezin e. Lehengên pirtûkên wî ku ew bi deng dixwîne ji nav pirtûkan derdikevin û dibin lehengên rastîn.
Dema Meggie hê pitik e Mo jere romana "Inkheart" dixwîne bi vê jîrekiya xwe dihese.
Fîlmê ku ji romana navdar a Cornelia Funke hatiye girtin, gelek lîstikvanên navdar bi hev re dide lîstin.
***
Despero - The Tale of Despereaux (2008)
Derhêner: Sam Fell, Robert Stevenhagen
Cure: Anîmasyon
Zemanekî welatekî pir xweşik a bandorker hebû. Li vî welatî ku li her derê wê kên û şahî jê difûre, mirov şorbeyên xweş dixwin û bi kêf dijîn.
Lê rojekê di encama qezayeke mezin de dilê Qral dişkê, prenses dikeve nav êşan, gelê welat dikevin nav xemgîniyê. Li ser axên welat roj tîrêjên xwe bi paş ve dikişîne, welat dikeve nav tarîtiyê, heta ku Desperaux Tilling tê dinê.
Despereaux Tilling ku mişkekî biçûcik e ji mişkên din dilpolatir e. Bi ser de jî gelek meraqxwir e. Ew bi çavên xwe yên mezin dike dinyayê kifş bike, bi guhên xwe yên qirase çîrokên nû dibihîze.
Ji mişkên din zêdetir tiştan dibîne, tiştan dibihîze. Ew birçiyê macerayan e.
***
Largo Winch (2008)
Derhêner: Jerome Salle
Lîstikvan: Tomer Sisley, Kristin Scott Thomas, Miki Manojlovic, Melanie Thierry
Cure: Macera
Dema karsaz Nerio Winch dimire li şîrketê şerê desthilatdariyê dest pê dike. Endamên Lijneya Rêveberiyê ya Şîrketê dema dibihîsin kurekî patron bi navê Largo heye ku ji hemûyan veşartiye pir şaş dibin.
Largo ku maceraperest, serhildêr û xwedî rihekî şervan e jiyaneke bi talûke dijî. Dema dibihîze bavê wî miriye, ji bo qontrola şîrketê bigire bin destê xwe dest bi têkoşînê dike..