Diyarname
13'emîn Festîvala Fîlman a Bogazîçî êvara 7'ê mehê bi nîşandayîna fîlmê "Filistîn 36" dest pê kir.

Merasima destpêkirina festîvalê li Salona Sînemayê Atlas 1948 ya li Beyogluya Stenbolê dest pê kir. Dîrektorê Festîvalê Ogun Şanlier qala rola sînemayê, festîvala wan ku ev 13 sal in li dar dixin kir û sipasiya piştgiran kir. Festîvala ku ji aliyê BKSV'ê (Weqfa Çand û Hunerê ya Bogazîçî) ve tê organîzekirin, Wezareta Çandê ya Tirkiyeyê, THY, Ajansa Anadolu piştgiriya wê dikin.

Şanlier di axaftina xwe de got, "Ji bo mirov hev fêm bikin, bibin hevparên êşên hev sinema amûrek e. Baweriya me ev e. Loma jî me nikarî li hemberî êşa mezin a li Filistînê çêdibe bêdeng bisekinin."

Şanlier li ser festîvalê jî got ku sala bê "Bosphorus Film Lab" a ku salên borî lidar dixistin wê careke din li dar bixin û piştiriya sînemageran bikin.

Piştî axaftinan fîlmê derhêner Annemarie Jacir ê bi navê "Filistîn 36" hat nîşandayîn. Fîlm di sala 1936'an de li gundekî Filistînê derbas dibe. Wê demê ew der di bin destê Îngilistanê de ye û cihû hê nû nû li wan deran bi cih dibin. Fîlm serhildana filistiniyan a li dijî îngilîzan nişan dide. 

Festival heta 14'ê mehê didome. Fîlmên festîvalê li salonên Atlas, Cinema Pink û AKM Yeşilçamê têne nîşanrayîn. Di festîvalê de du belgefîlmên bi kurdî jî hene.

Dîrektorê Festîvalê Ogun Şanlier sipasiya piştgirên festîvalê kir. Derhênera fîlm Annemarie Jacir û lîstikvanên fîlm li merasimê amade bûn (fotoyê pêşî).

***

Nûçeya Eleqedar:
- Festîvala Fîlman a Bogazîçî tê