Diyarname
Kovara fransiz Le Point ku heftane dertê, vê hefteyê Serokdewletê DYA'yê Donald Trump kir berga xwe û ji bo wî manşeta "Zilamê Moskovayê" nivîsî.

Kovarê îdîa kir ku Turmp di dema Yekîtiya Sovyetê de ji bo îstîxbarata wê demê ya Sovyetê KGB'ê xebitiye û kodê wî jî "Krasnov" bûye. Dosyaya ku di vî warî de li ser Trumpî hatiye amadekirin ji 15 rûpelan pêk tê. Kovarê îdîa kiriye ku dibe Trump di salên 1980'yî de ji bo KGB'ê xebitî be.

Le Pointê ev îdîa anî ziman, "Ew xebatkarê daîreya şeşan a KGB'ê bû, karê wî jî ew bû ku der barê karsazên dewlemend ên welatên rojava de agahiyan bide. Trumpî bi saya vê gelek projeyên emlakê yên li New Yorkê çêkirin û firotin mafyaya Rusyayê."

Kesê ku ev îdîa pêşkêş kiriye jî ajanê KGB'ê Sergey Jirnov e. Jirnov piştî ajantiya KGB'ê hatibû xwe parastibû Fransayê. Wî jî ev îdîaya xwe spartiya Elnur Musayev ku endamê berê yê daîreya şeşan a KGB'ê bû.
Yek ji îdîayan jî ew e ku di sala 1987'an de Trump û jina wî ji bo Moskovayê hatine vexwendin ku saziyeke girîdayî KGB'ê ew vexwendine.