Diyarname

Îro hin hunermenda bi vîdyo û daxuyaniyan piştgirî da DEM Partî û di hilbijartinê de banga piştgiriyê kir.

Va ne ew hunermend:

MÎKAÎL ASLAN: DEM DEMÊ MA WO

- Hunermend Mîkaîl Aslanî bi kirmackî (zazakî) vîdyoyek kir vila û got, "Şarê ma wo qedir giran, no zem niyo, DEM o" Aslanî got ku "Rê û rêça ma beli ya. Cayê ma beliyo, royê ma beliyo" û ev yek lê zêde kir, "Xelet meşimê, locina kê xwu kor mekimê, locina şarî tanî nêdana ma. DEM demê ma wo, eskera wo, wa eskera bo."

ŞIVAN PERWER: DENGÊ XWE BIDIN XWE

- Hunermend Şivan Perwer ku beşdarî Stêrk TV bû bang li gelê Rihayê kir. Perwer ku bi xwe ji Rihayê ye banga piştgiriya DEM Partî kir û got, "Em dengê xwe bidin xwe. Riha, bêje ez dengê xwe nadim zaliman, nijadperestan, kedxwaran. Riha, gere vê bîne bîra xwe."

KASIM TAŞDOGAN: JI BO ROJÊN AZADTIR DENGÊ XWE BIDIN

- Hunermerd Kasim Taşdogan jî bi vîdyoyek piştgiriya xwe eşkere kir. Taşdogan got "Bi taybetî cihên wekî Çewligê, Dêrsimê, Qereqoçan, Qersê, Îdirê, Erdexanê, Mûşê, Agiriyê, Rihayê û navçeyên wê, wekî navçeya Kûlûya Konyayê, li Stenbolê û li Dîlovasiyê bi taybetî ez dixwazim li van deran û bi gelemperî jî li her derê welêt heta ji destê we tê dengê xwe bikar bînin, ji bo rojên azadtir, rojên serfiraztir." 

HUNERMENDÊN LI EWROPAYÊ

Li Ewropayê jî hunermendên TEV-ÇAND'ê banga piştgiriyê kirin. Hunermend Hozan Aydin, Amele, Zahir Loran, Azad Aslan, Hozan Kawa, Berbang Hilat, Merwan Tan, Deza Amed, Sîpan Xelat, Şiyar Munzur, Onur Evîn, Hozan Canê, dengbêj Maruf û Farqîn Amed ji bo roja 31'ê adarê banga piştgiriya DEM-Partî kirin.