Diyarname

8'emîn Festîvala Belgefîlman FîlmAmed vê êvarê bi merasimek dest pê kir. Fîlmê "Zimanê Dayikê" wekî belgefîlmê destpêkirina FîlmAmedê hat nîşandayîn.

Di merasima destpêkirina FîlmAmedê de Hevseroka DBP'ê Saliha Aydeniz, Mebûsa Yeşîl Sol Partî Meral Daniş Beştaş, gelek sînemager û mêvan amade bûn.

'FÎLMAMED DIJÎ TALANÊ YE'

Derhêner û yek ji amadekaran Metin Ewr axivî û got, "Ji ber sedemên ne di dest me de ev demek bû me navber dabû festîvalê. Lê îro bi piştgiriya hunerhezan em ligel we ne. Emê rewşa welat di van belgefîlman de xweş bibînin. Bi talanê dixwazin welatê me têk bibin. Bi sansurê heyî diyar dibe ku em çiqas karekî girîng dikin. FîlmAmed helwesteke dijî talanê ye, dijî vê berxwedan e."

'DÊ SÎNEMAYA AZAD BI SER BIKEVE'

Ew êrîşên li hemberî Yilmaz Guney ku di van rojên dawî de têne kirin bibîr anî û got, "Yilmaz Guney derhênerekî berxwedêr e, li sînemayê helwestekî ye. Li hemberî nasnameya wî ev êrîş têne kirin. Wekî ku wî gotibû, 'Çi dibe bila bibe, miheqeq emê bi ser bikevin'. Çi diba bila bibe dê sînemaya azad bi ser bikeve."

'FÎLMAMED LI HEMBERÎ SANSURÊ BERXWEDAN E' 

Mebûsa Yeşîl Sol Partî Beştaş jî di axaftina xwe de diyar kir ku FîlmAmed li hemberî sansurê berxwedaneke girîng e û wisa dom kir, "Kayûman tenê dest nedanî ser şaredariyan, di heman demê de polîtîkaya îhma, înkar û asîmîlasyonê dom kirin. Dest danîn ser hemû saziyên me. Li hemberî ziman û çanda me zordariyeke mezin derxistin holê."

Piştî axaftina belgefîlmê derhêner Serkêw Mesgarî ê bi navê "Zimanê Dayikê" hat nîşandayîn. Di belgefîlm de li ser zimanê kurdî, perwerdehiya bi kurdî tê sekinîn.

Piştî nîşandayîna belgefîlmî Hevseroka DBP'ê Aydeniz plaketek da derhêner Sarkew Mesgarî.

FîlmAmed heta 1'ê mehê dê bidome. Belgefîlm li salona Şanoya Bajêr a Amedê, Salona Sînemayê ya Bezgîn Bekîr, Salona Zarok MA û salona Komeleya Çand û Hunerê ya Dîcleyê têne nîşandayîn.

**

Nûçeya Eleqedar:

- Va ye bernameya FîlmAmedê

- 4 pêşbaziyên kurdan li benda berheman in

- FîlmAmed tê: Niha dema serîlêdanê ye