Amed
KURDÎ-DER, TZPKurdî û Komeleya Nivîskarên Kurd lêpirsîna bi boneya dersa kurdî daye li Mamoste Medya hatî vekirin, şermezar kirin û piştgirî dan Medya.
Sekretera KURDÎ-DER'ê Mekiye Ormanci, diyar kir li tu deverên cîhanê bi boneya bi zimanê xwe ders daye lêpirsîn li zarokek 10 salî venebûye. Ormanci xwest ku zarok li dibistanan fêrî zimanê xwe bibin.
Dozgeriya Komarê ya Amedê, bi boneya Mamoste Medya ya 10 salî li mala xwe dersa kurdî daye der barê Medya, malbata wê û Şaredarê Sûrê Abdullah Demîrbaş de lêpirsîn vekiribû. Endam û rêveberên KURDÎ-DER, TZPKurdî û Komeleyên Niviskarên Kurd bi armanca şermezarkirina lêpirsinê Mamoste Medya ziraret kirin. Di ziyaretê de li ser navê saziyan Sekretara Giştî ya KURDÎ-DER'ê Mekiye Ormanci, lêpirsîna awayekî tund rexne kir û diyar kir ku ev polîtîkaya dewletê ya 80 salan e.
'Ku li dibistanan derfet hebûna tiştek wiha çêne dibû'
Ormanci, rêbaza dersdayîna Mamoste Medya wekî eyba dewletê nirxand û wiha got: "Ger ku dewletê derfetên perwerdehiya kurdî li dibistanan dabûya zarokan, wê demê tabloyek wisa çênedibû. Li şûna dewlet rê li pêşiya perwerdehiya kurdî veke, li zarokên ku li mala xwe ferî zimanên xwe dibin û dersê didin lêpirsînê vedike. Mînakên bi vî rengî li tu deverên cîhanê nehatine dîtin."
Serokê Enstîtuya Kurd a Amedê Aydin Alukmen jî bi bîr xist ku ziman mafê mirovan ê herî bingehîn e û wiha axivî: "Em vê lêpirsînê şermezar dikin. Em heta dawî piştgiriyê didin Mamoste Medya."
Dê ders dom bike
Mamoste medya jî destnîşan kir ku di destpêkê de 4 şagirtên wê hebûn û niha 27 şagirtên wê hene. Medya anî ziman ku wê polek mezûn kiriye û dê îsal dîsa dersê bide şagirtan. Piştre rêveber û nûnerên saziyan Şaredarê Sûrê Abdullah Demîrbaş jî ziyaret kirin û piştgiriya xwe anîn ziman.
Ji DÎHA'yê hatiye girtin