Diyarname
Derhêner Seyfi Teoman ku bi fîlmên xwe "Tatil Kitabi" û "Bizim Buyuk Çaresizligimiz" navdar bûbû îro wefat kir.

Teoman roja 17'ê avrêlê li Rêya Bejayî E-5 a Bakirkoya Stenbolê bi bisqilêtê qeza kiribû. Ew rakiribûn nexweşxaneyê û li Nexweşxaneya Çapayê ji bo dermankirinê demek kiribûn xewê jî. Lê di dawiyê de nekarîn Toramanî li jiyanê vegerînin.

Seyfi Teoman kî ye?

Derhêner Seyfî Teoman di sala 1977'an de li Kayserî hatibû dinê. Piştî wu Beşa Îktîsadî ya Zanîngeha Bogazîçî xwendibû, li Polonyayê li Akademiya Fîlman a Lodzê perwerdehî dîtibû. Piştî perwerdehiyê di sala 2004'an de kurtefîlmê bi navê Apartman kişand û pê gelek xelat girt. Dûre wî fîlmê metrajdirêj bi navê "Tatil Kitabi" kişandû di 58'emîn Festîvala Fîlman a Berlînê de tekane fîlmê ji Tirkiyeyê beşdar bûyî bû. Fîlmê ku di sala 2008'an de li Berlînê galaya xwe kir li Tirkiyeyê di 27'emîn Festîvala Fîlman a Stenbolê de xelata Fîlmê Herî Serketî û Xelata Fipresciyê girt.
Teoman bi navê "Bizim Buyuk Çaresizligimiz" (Bêçaretiya me ya mezin) duyemîn fîlmê xwe yê metrajdirêj kişand ku ev fîlm ji romana Bariş Biçakçi yê bi heman navî girtibû. Teoman bi fîlmî beşdarî 61'emîn Festîvala Fîlman a Berlînê beşa pêşbaziyê bû.
Di 31'emîn Festîvala Fîlman a Stenbolê de fîlmê bi navê "Tepenin Ardi" xelata Laleya Zêrîn girt ku yek ji sazkarên vî fîlmî Seyfi Teoman bû.

Roja 9'ê mehê saet 18.00'an de li Kampusa Başûr a Zanîngeha Bogaziçiya Stenbolê ji bo Teoman dê merasimeke bê lidar xistin. Her wiha ji hezkiriyên Teoman rica hate kirin ku çelengê neşînin ser cenazeyê, yên bixwazin dikarin ji bo vê yekê alîkariya Weqfa Perwerdehî ya Mithat Alan bikin.