Diyarname
Baroya Amedê û 16 Baroyan din, der barê biryara YSK'ê de daxuyanî da û got: Biryara YSK'ê dijhiqûqî û siyasî ye.

Baroyên Agirî, Semsûr, Batman, Bedlîs, Çewlik, Amed, Elezîz, Culemêrg, Qers, Mêrdîn, Mûş, Sêrt, Şirnex, Riha, Dêrsim û Wanê di der barê biryara YSK'ê de daxuyaniyeke da çapemeniyê. Baroyan di daxuyaniyê de balkişandin ser vetokirina 12 namzetên serbixwe û diyar kirin ku biryar ne hiqûqî, siyasî ye. Di daxuyaniyê de hate diyarkirin ku biryara YSK'ê pir bi wate ye û Tirkiyeyê ber bi aloziyê ve dibe.
Di daxuyaniya hevbeş de hate diyarkirin ku biryara hatiye dayîn ji hiqûq, demokrasî, zagon û rastiyê dûr e û bi temamî biryarek siyasî û kefî ye.

Baroyan, di daxuyaniyê de anî ziman ku biryara der barê namzetan de hatiye dayîn li dijî aqil û mafê mirovan e û binpêkirina mafên hilbijartin û hilbijêriyê ye. Baroyan, da zanîn ku Selîm Sadak, Leyla Zana û Hatîp Dîcle ji heman dosyayê ceza girtibûn, lê ev helwesta ku yekî ceza dike yekî ceza nake kêfî ye û wiha dom kir: "Heyeta ku ji bo Selîm Sadak serdan qebûl kir, divê ji bo Zana û Dîcle jî serdanê qebûl bike. "

Baroyan benda hilbijartinê ya ji sedî 10 jî rexne kir û got ku ev astengiya li pêşiya demokrasiyê ye. Di daxuyaniyê de hate zanîn ku ev bendav xizmeta pêşxistina Tirkiyeyê nake û li pêşiya pêşketina Tirkiyeyê dibe asteng.