Diyarname
Rehet dikare bê gotin li Stenbolê "Rewşa Awarte" heye. Ji bo ku karker 1'ê Gulanê Roja Kedkarên Cîhanê pîroz nekin dewlet û hikumeta Tirkiyeyê li Stenbolê hemû biryarên qedexeyê girtine û hemû hêza xwe ya ewlehiyê daxistiye kolanan. Vane notên ji Stenbolê:
15.30
- Komeleya Hiqûqnasên Kartalê ragihand ku hejmara kesên girtine bin çavan derket bi ser 250'î.
- Berendamê mebûsî yê HDP'ê yê Herêma 2'yemîn Salih Şahin jî girtin bin çavan.
14.30
- Li gelek kuçeyên Beşîktaşê polîs hê jî erîşê gel dikin. Gelek bombeyên çavsotîner têne bikaranîn. Polîsan camên avahiyek şikandin û xwestin bikevin hundir. Polîs her kuçeyê ketiye dû çalakvanan, dixwaze wan bigire bin çavan. Di vê navberê de li Beşîktaşê xebatkarekî otoparkê kêr li çalakvanekî da û ew birîndar kir.
- Mebûsa HDP'ê Sebahat Tuncel di encama êrîşa polîsan de ji ser hişê xwe çû. Di serî de mebûsa HDP'ê Pervin Buldan, rêveberên din ên HDP'ê jî para xwe ji gava çavsotîner girtin. (Rewşa mebûsan baş e. Ev not paşê lê hat zêdekirin)
- Li Qada Kartala Stenbolê jî polîsan êrîşê gel kir.
14.00
- DÎSK'ê agahî ji bo Walîtî şandibû ku ji Beşîktaşê bi komek biçûk here Taksîmê. Li benda agahiyê bû, lê destûr nehat dayîn û polîsan saet nêzî 14.00'an bi bombeyên çavsotîner êrîşê komek gel ku hê li wir bûn kir. TOMA'yê jî bi avê êrîşê gel kir. (Dê daxuyanî bihata dayîn, polîsan nehişt)
- Li Fulyaya Beşîktaşê ligel polîsan hin kesên sivîl ku sope di destên wan de bûn êrîşê çalakvanan kirin û li wan dan. Polîsan dest neda wan êrîşkaran.
- Hat îdîakirin ku polîsan anons kiriye gotiye zêdetir kesan bigirin bin çavan.
13.00
- Li gor nûçeya ETHA'yê nûçegîhana ETHA'yê Ece Şimşek li Okmeydani di êrîşa polîsan de bi guleya plastîkî ji pişta xwe hate birîndarkirin.
- Maseya Qeyranê (Ji ÎHD, ÇHD, TOHAV û gelek saziyên din pêk tê) ragihand ku hejmara kesên hatine binçavkirin derketiye 150'î.
12.30
- Komîteya Pîrozbahiya 1 Gulanê bi polîsan re xeber da û xwest rê bê vekirin. Serokê DÎSK'ê Kanî Beko piştî hevdîtinê got: Me xwest pevçûnên li derdorê çêdibin rawestin, barîkat bêne rakirin û hevalên me bên vir. Paşê emê dîsa nirxandinê bikin. Piştî hevalên me bên vir em dixwazin bi komek sembolîk derkevin Taksîmê.
- Li Kadikoy komek ji SÎME-SEN'ê dest bi pîrozbahiya 1'ê Gulanê kir. Wan jî biryar dabû ku li Kadikoyê pîrozbahî bikin.
11.30
- Hevseroka HDP'ê Figen Yuksekdag, Mebûsên HDP'ê Pervin Buldan û Sebahat Tuncel, Hevserokên HDP'ya Stenbolê Cesim Soylu û Ayşe Erdem ligel rêveberên HDP'ê hatin Qada Beşiktaşê.
- Komek endamên Partiya Komunîst ku li Taksîmê li avahiyeke ber qadê xwe bi cih kiribû, ji nişke ve derketin û ber bi Qada Taksîmê ve beziyan. Kom li ber peykera qadê gihîştin hev, bi gotineke din ji bo çend deqeyan be jî ketin qadê lê polîsan di cih de êrîşê wan kir û ew girtin bin çavan.
- Serokê DÎSK'ê Kanî Beko li Beşîktaşê daxuyanî da û got ku li gelek herêman telefon ji bo me tên, ajokarên otobusan têne tehdîdkirin ku karker û kedkaran nebin. Her wiha polîsan dest daniye ser ehliyeta hin ajokaran.
11.00
- Baroya Stenbolê daxuyanî da (saet li dor 11'an) û got ku heta niha 70 kes hatine binçavkirin.
10.30
Kedkarên dewletê li Bakirkoy in
- Turk-îş ku wekî sendîkayeke dewletê tê dîtin îsal jî ligel sendîkayên din nebû yek û biryar da ku li Bakirkoyê 1'ê Gulanê pîroz bike. Turk-Îş ligel partiya Dogu Perinçek Vatan Partîsî li Bakirkoy hat ba hev û dest bi pîrozbahiyê kir.
- Endamên Egîtîm Senê ku ji Încîrliyê dixwestin herin Taksîmê polîsan pêşî li erebeyên wan girtin. Ev yek bû sedem ku rê jî bê girtin.
- Li Zîncîrlîkuyu komek xwest bê ba hev polîsan nehişt. Polîsan bi TOMA'yan êrîş kir û ew belav kirin.
- Li Pangaltiya Şîşlî jî polîsa êrîşê komê kirin.
09.00
- Walîtiya Stenbolê pîrozbahiya 1'ê Gulanê li Taksîmê qedexe kir. Ji bo vê yekê derdora Taksîmê bi bariyeran hate girtin.
- Li Stenbolê 20 hezar polîs li her derê hatine bi cih kirin, ligel TOMA'yan.
08.00
Hemû rêyên derdikevin Taksîmê betal kirin
- Metrobus ji Kadikoy nayên ku hatin betalkirin. Metrobusên ji Avcilar jî tê heta Cevizlibag tên, ji wir wêdetir hatin betalkirin. Metroya ku diçe Taksîmê hate betalkirin. Keştiyên diçin diçin Karakoy hatin betalkirin.