Stockholm

Komeleyên Kurdistanê li Swêdê, Kitêbxaneya Kurdî li Stockholmê û Komeleya Nivîskarên Kurd di 18'ê reşemiyê li Kitêbxaneya Kurdî çar nivîskarên kurd Cegerxwîn, Kerîm Husamî, Mehmud Baksî û Mehmed Uzun bi bîr anîn.

Ji bo hurmetgirtina her çar nivîskarên kurd, ked û xebata wan ya nivîskariyê ya domdirêj û berhemdar hate lidarxistin. Li aliyekê her çar nivîskaran jî kedeke mezin daye xebata kurdî aliyê din ê her çar nivîskaran a hevpar jî ew e ku her çaran jî beşeke jiyana xwe li Swêdê derkabs kiriye. Û niha li Swêdê her car di çalakiyekê de hatin bibîranîn.

Şermîn Bozarslan li ser navê Federasyonê, Newzad Hirorî li ser navê Kitêbxaneyê û Xelîl Duhokî jî li ser navê Komeleya Nivîskaran bixêrhatin li mêvanan kir. Her wiha ji malbatên her çar nivîskaran axiftin li ser jiyan û kesatiya wan hat kirin.

Ji beşdaran Azad Cegerxwîn li ser bavê xwe Cegerxwîn, Lutfî Baksî li ser birayê xwe Mehmûd Baksî, Cefer Marûfî li ser xalê xwe Kerîm Husamî û xanima Mehmed Uzun Zozan Uzun jî li ser wî axivî.

Di çalakiyê de plaketek jî dan xizmên van her çar nivîskaran.
 
Hunermend Ferîborzî jî bi klarnêta xwe di du navbiran de du awazên kurdî yên xweş û bi coş pêşkêş kirin.
Serokê Komeleya Nivîskarên Kurd Paşa Brodirêjî daxuyaniya hevbeş ya hersê saziyan ya bi minasebeta roja zimanê zikmakî xwend û paşî bû gera sohbet, beqlave û qehweyê.

Di daxuyaniya ku hate xwendin de jî Roja Zimanê Zikmakî hate pîrozkirin û wiha hate gotin: "Em dixwazin her yek ji me, çi kes û çi rêxistin, dengê xwe bigehîne UNESCO, Yekîtiya Ewropa û Neteweyên Yekbûyî û jê bixwaze ku ew dawî li vê bêdengiya xwe bînin, li mafên kurdan xwedî derkevin û hikumetên Tirkiye, Sûriye û Îranê mecbûr bikin ku zimanê kurdî bikin zimanekê resmî û zimanê perwerdeyê"