AMED
Saziyên Çand û Ziman ên kurdî roja 21'ê mehê Cejna Şeva Yeldayê bi çalakiyên çandî pîroz dikin.

Kovara Destar, Komeleya Lêkolînên Ziman û Çandên Mezopotamyayê (MED-DER), Enstîtuya Kurdî ya Stenbolê, Enstîtuya Kurdî ya Amedê, Komeleya Lêkolînên Ziman û Çandên Arî, Komeleya Wêjekarên Kurd, Komeleya Lêkolînên Çand û Ziman a Arsîsayê, Komeleya Lêkolînên Ziman û Çandên Botanê, Komeleya Lêkolînên Çand û Ziman a Avestayê, Komeleya Lêkolînên Çand û Ziman a Ankayê, Komeleya Lêkolînên Çand û Ziman a Feradê, Komeleya Lêkolînên Çand û Ziman a Birca Belekê, Komeleya Çand û Hunerê ya Dîcleyê, Navenda Çandê ya Biharê, Enstîtuya Kurdî ya Stockholmê, Enstîtuya Kurdî ya Almanyayê, Enstîtuya Kurdî ya Brukselê, Enstîtuya Kurdî ya Swîsreyê ji bo Cejna Şeva Yeldayê daxuyaniyek nivîskî belav kirin.

Di daxuyaniyê de hat got ku ligel Cejna Çarşema Sor, Cejna Newrozê, Cejna Şeva Yeldayê jî yek ji van 3 cejnên kurdan ên sereke ye.Hat diyar kirin ku ev be hezaran salan e ev cejn tê pîroz kirin û ev yek lê hat zêdetkirin: "Cejna Şeva Yeldayê ji bo kurdan xwedî cihekî qedîm e û wekî Şevçile, Şeva Mêhr an jî Mêhra, Şevçere, Şevçile, Çilekilû, Şeva Rojvegerê, Şeva Ronahiyê, Şeva Zayîna Tav û Ronahiyê, Şeva Mîtrayê jî tê binavkirin û şeva herî dirêj e û li gel vê şevê salek bi dawî dibe û saleke nû dest pê dike."

NOEL û ŞEVA YELDAYÊ 

Di daxuyaniyê de Şeva Yelda xwedî fikr, raman, felsefe, bawerî ye û wisa hatiye gotin:  Yek ji pîrozweriyên felsefe, bîr û baweriya mîtrayî ye, ku ev felsefe, bîr û baweriya kurdan a herî qedîm a xwezayî, xwebûnî û gerdûnî ye. Li gor daneyên lêkolîn û vekolînên dîrokî û zanistî ‘Noel’ anku sersala mîladî ku îro li her aliyê cîhanê tê pîrozkirin jî bingeh û çavkaniya xwe ji Şeva Yeldayê digire. Cejna Yeldayê bi hezaran sal e, li her çar milên Kurdistanê wekî cejneke neteweyî tê pîrozkirin. Lê sed mixabin ji ber dagirkirina Kurdistanê ya bi sedan sal e wekî gelek nirxên din, ev nirxê kurdan ê neteweyî jî hatibû asta jiholêrakirinê. Îro di encama têkoşîna neteweya kurd a bêhempa de wekî gelek nirxên din ên kurdewar ev çand, bawerî û felsefeya pîroz a Şeva Yeldayê jî carek din zindî dibe û li her çar milên Kurdistan û li her derên cîhanê yên ku kurd lê dijîn belav dibe."

BANGA TEVLIBÛNA PÎROZBAHIYÊ

Saziyan bang li her kesî kiriye Cejna Yeldayê, anku Şevçileyê bi şahî û bernameyên cur bi cur pîroz bikin û têkoşîna parastin û pêşxistina nirxên neteweya kurd kirine.

BERNAMEYA AMEDÊ

Li Amedê sazî bi hev re li Komeleya Çand û Hunerê ya Dîcleyê dê Şeva Yeldayê bi bernameyê pîroz bikin. Bername 21'ê mehê saet 18.00'an de li dar dikeve. Di bernameyê de sînevazyon, xwendina helbestan, stran û klam, her wiha dê pêşbirk jî hebe.