Diyarname
Desteya Rêveberiya Enstîtuya Kurdî ya Stenbolê li ser wefata Prof. Dr. Îsmet Şerîf Wanli, Mulazim Ozcan û erdheja Wanê daxuyanî da.

Vaye daxuyaniya Enstîtuya Kurdî ya Stenbolê:

"Em bi xemgînî hîn bûn ku yek ji kedkarên doza kurdayetiyê, rewşenbîrê hêja Prof. Dr. Îsmet Şerîf Wanli koça dawîn kiriye. Têkoşerê doza azadiya gelê kurd Prof. Dr. Îsmet Şerîf Wanli di avakirina Enstîtuya Kurdî ya Stenbolê de jî xwedî kedeke heja ye. Em dibêjin bila serê gelê kurd û serê malbata wî sax be, bila cihê wî bihuşta berîn be.
Têkoşîna gelê kurd êdî ketiye qonaxa çareseriyê, azadî êdî bivê nevê tu êrîşên dagirkeran nikarin rê li ber azadiya gelê kurd û azadiya zimanê kurdî wergirin. Lê dîsa jî hêzên dagirker ji bo ku rê li ber doza azadiya gelê kurd bigirin êrîşên xwe li ser têkoşerên doza azadiyê kêm nakin, herî dawîn saziya me jî bi ber van êrîşan ket û endamê Desteya Rêveber a Enstîtuya Kurdî Mulazim Ozcan hate girtin. Em van êrîşan jî bi tundî şermezar dikin û bang li raya giştî ya demokratîk dikin ku li hemberî van êrîşan dengê xwe berz û bilind bike.
Her wiha em wekî Enstîtuya Kurdî ya Stenbolê jana gelê me yê Wanê ya ji ber erdhejê jî parve dikin, ji malbatên kesên ku jiyana xwe ji dest dane sersaxiyê û ji birîndaran re şîfayê dixwazin."

***

Nûçeyên eleqedar:

- BDP'ê: Emê têkoşîna Vanli bidomînin

- KNK’ê ji bo Prof. Dr. Wanlî peyama sersaxiyê weşand

- Îsmet Şerîf Vanli wefat kir