Diyarname

Ji bo ku kurdî di serdema 2022-2023’yan wekî derseke hilbijartî bê dîtin îsal gelek hewldan hatin kirin û encam payîzê dê diyar bibe. Lê par çend xwendekaran dersa kurdî hilbijartiye? Mebûsê CHP’ê Sezgin Tanriklu ji Wezîrê Perwerdehiyê yê Tirkiyeyê pirsî û reqemên par eşkere bûn.

Li gor nûçeya Tamer Arda Erşîn a di ajansa nûçeyan ANKA’yê de, di bersivê de derketiye holê ku par (Ji bo serdema 2021-2022’yan) 20 hezar û 265 xwendekarî dersa kurdî hilbijartiye.

Tanrikulu roja 2’yê vê mehê ji Wezîrê Perwerdehiya Neteweyî ya Tirkiyeyê Mahmut Ozer pirs kiriye û wezîr 17’ê vê mehê bersiv daye. Wezîrî diyar kiriye ku 20 hezar û 265 xwendekarî dersa kurdî hilbijartiye. Her wiha diyar kiriye ku hinan dersa abazî, lazî, gurcî, arnawûdî û boşnakî jî hilbijartiye.

 ***