Diyarname

Mebûsa HDP'ê ya Rihayê Aşye Surucu îro li Meclisa Tirkiyeyê piştî ku got "Ezê van gotinan bi kurdî bêjim û paşê ji bo we wergerînim tirkî" û dest bi axaftina bi kurdî kir, mîkrofona wê girtin û nehiştin bi kurdî biaxive.

Îro li Meclisa Tirkiyeyê li ser butçeya sala 2022'yan a Wezareta Teknolojî û Saniyiyê û butçeya saziyên girêdayî Wezareta Karê Hundir axaftin hebûn. Mebûsa HDP'ê Surucu jî mafê axaftinê girt. Surucu pêşî qala girtiyên xweşik Aysel Tugluk û yên din kir û got ku divê di cih de ew bên berdan.

Surucu paşê got ku ew dixwaze çend tiştan jî bi kurdî bêje û dûre dê van gotinan veguherîne tirkî. Piştî dest bi axaftina bi kurdî kir, mîkrofona wê hat girtin û nehiştin ew bi kurdî bidomîne.

Piştî carek din dengê wê vekirin Surucu got, "Çima hûn tehamul nakin ku li vir em çend gotinan bi kurdî bikin? Ev zimanê min ê zikmakî ye. Hinek tehemul bikin. Bi kurdî axivîn, bi kurdî helbest nivîsîn, stran strîn, bi kurdî lîstina şanoyê, her wiha fîkandin bi kurdî jî li vî welatî hat qedexekirin. Êdî dest ji van polîtîkayên qedexekar berdin. Em kurd in, zimanê me yê zikmakî kurdî ye. Govendên me jî, dilxweşiyê me jî, xemgîniya me jî, jiyana me jî bi kurdî ye. Êdî dest ji vê polîtîkaya qedexekar, vê înkarê, dest ji neyartiya kurdî berdin. Bi vê hestê ez silav û hurmetê xwe bo gelê me dişînim."

Va ye ew vîdyo:

 **

MAIL: diyarname@diyarname.com