Qers
Kurtedemek berê Şaredariya Bajaroka Bazarcixê ya Qersê atolyeya şanoyê ya bi kurdî da dest pê kirin. Di atolyeyê de lîstikvan û derhêner Aydin Orak mamostetî kir. 12 kes ji bo atolyeyê hatin qebûlkirin û wan 10 rojan qurs dît.
Di dawiya atolyeyê de komê yekemîn lîstika xwe bi navê "Ji Bazarcixê çend çîrok" derxist ser dikê.

Şaredarê Bazarcixê Ayhan Erkmen, Serokê Rêxistina BDP'ê ya Qersê Îdrîs Agbaba û gelek kes ji bo temaşekirina lîstikê amade bûn.

Şeva pêşkêşkirina lîstikê ku li Navneda Çandê ya Şaredariya Bazarcixê pêk hat Şaredar Erkmen û Serokê Rêxistina BDP'ê ya Qersê Îdrîs Agbaba sertîfîkayên lîstikvanan da wan û plaketa spasiyê jî da derhêner Aydin Orak.

Lîstika rastî eleqeya gelê bajarokê hat û ji ber ku salon bûçûk bû dê îro jî lîstik bê pêşandan. Şaredarê Bazarcixê Ayhan Erkmen, diyar kir ku ji bo berdevam xebatên çandê dê derfetan biafirinin.

Dîtinên li ser lîstikê:

Şaredarê Bazarcixê Ayhan Erkmen:
Me Navenda Çandê di sala 2005'an de vekir. Ji roja me vekîr heta niha armanca me ew bû ku em komekî lîstikvanên ji ciwanên bajaroka me yên profesyonel derxin ser dikê. Salên borî ji derveyî bajarokê lîstîkvan dihatin lîstik dilîstin. Piştî me dît ku gel ji bo van şahiyan bihestiyar e me biryara avakirina komek da Li ser vê biryarê me gazî derhênerê şanoya kurd Aydin Orak kir. Me xebatên Atolyeya Şanoyê ya 10 rojan da meşandin. Di vê atoleyeyê de ciwanên bajaroka me perwerdehiya şanogeriyê dîtin. Dem kin bû lê disa jî baş hînbûn. Di şeva fînalê de em hemû matmayî man. Ev yek jî nîşan dide ku ciwanên me bi qabîleyetekî şanogeriyê ya xwezayî ne. Heke derfetên wan hebe dê gelek karên baş bikin."

Derhêner Aydin Orak:
Dema ez hatim şaredariyê tenê 2 kesan ji bo qursê qeydên xwe çêkiribûn. Kesên ji bo me temaşe bikin û mêvan, meraq kirin hatin bi me re sohbet kirin. Piştî wan xebatên me yên şanoyê dîtin daxwaza wan jî çêbû. Me jî bi 12 kesan sînor girt. Me bi van 12 kesan di nav 10 rojan de xebateke bi hêz kir. Her roj me gelek prova kirin. Her roj heta êvarê xebatên me domand. Heta derengiya şevê provayên me berdevam kirin. Ciwanan berê şerm dikirin derkevin ser dikê di demekî kin de wekî şanogerên hosta êdî ji ser dikê nedihatin xwarê.

Listikvan Akin Anli:
Atoleyeya Şanoyê ji bo min guhertinekî mezin bûn. Li vir jiyana min gelek monoton diçû. Êdî karên her roj min dikir ên wekî hev nerihetî dida min. Atolye ji bo min guhertinekî mezin pêk anî. Di nava wan 10 rojan de ez gelek tiştên baş jiyam. Ji bilî xebatên Atolyeya Şanoyê min çêlek dibirin diçerandin."

Lîstikvar Şenay Erkmen:
Ez ji Ewropayê ji bo betlaneyê hatim. Dema ku min xebatên vê atolyeyê li vir dîtin, min jî got çima ez jî tevlî nebim. Min jî qeyda xwe çêkir. 10 roj gelek xweş derbas bûn. Di şeva fînalê de ez nedifikirîm ku ezê wekî lîstîkvan derkevim pêşberî girseyê. Ji bo min guhertinekî mezin bû. "