Diyarname

Şêwekar, rojnameger, amadekar û pêşkêşvanê bernameyan Şêrko Celal roja 28'ê mehê li nexweşxaneyeke li Lille ya Fransayê ji ber vîrusa koronayê mir.

Şêrko Celal ku wekî Şêrko Celal Mameş Koyê dihat nasîn, di sala 1956'an de li bajarê Koyê hatiye dinê. Dibistana seretayî li Koyê dixwîne û piştre ji ber rewşa taybet a  wê demê ya Koyê li Hewlêrê bi cih dibin.  Li Hewlêrê dibistana navîn dixwîne û ji bo xwendina zanîngehê beşa hûnerên ciwan berê xwe dide Bexdayê.

Di sala 1974'an ew ligel birayê xwe dibe pêşmerge. Ew li çiya jî bi hunerê re eleqedar dibe. Şêrko Celal di sala 1981'ê de ji ber rewşa siyasî ji başûrê Kurdistanê derdikeve û di sala 1982'yan de li Fransayê bi cih dibe. 

Di sala 2002'an de dibe pêşkêşvanê Roj TV û destpêkê wekî pêşkêşvanê bernameya Rojbaş Kurdistan dest bi kar dike. Dûre dibe  amadekar û pêşkêşvanê bernameya Tîşkî Huner. Bernameya Tîşkî Huner yek ji wan bernameyên diyar û yekane bû ku bernameya hunerê şêwekarî bû û hercarê serdana hunermendeke/î şêwekar a/ê kurd dikir.

Piştre sala 2012'yan di kanala Stêrk TV de navê bernameya xwe guhert û kir Rêjney Reng û bi şêwaz û rengekî nû, dîsa her carê li gel hunermendeke/î şêwekar karê xwe berdewam kir.

Şêrko Celal di jiyana xwe ya medyayê de xizmeteke gelekî zêde da qada hunera Kurd û bi sedan bernameyên xwe di arşîva Stêrk tv de li pey xwe hişt ku ev jî weke xizmeteke vê kanalê tê tomarkirin. 

Bernamevan û pêşkêşvan Şêrko Celal ligel karê xwe yê medyayê hin nivîs û gotarên bi şêweyên cuda nivîsîn bû û hen wiha hin helbest jî nivîsîn û li dû xwe hiştin.

Jina Şêrko Celal jî berî çend salan ji ber nexweşiya penceşêrê miribû. Cenazeyê Şêrko Celal li Lile tê definkirin..