Zekî Ozmen

Serokwezîra Almanyayê Merkel diyar kir ku ew dixwaze pirsgirêka kurd bi rêbazên aştiyane çareser bibe û ew ê vê xwastekê ligel hikûmeta Tirkiyeyê daynin ser maseyê. 

Merkel di axaftina xwe ya videoyî ya heftane de îro bi taybetî derbarê têkiliyên Almanya û Tirkiyeyê de axivî. Derbarê civîna hevpar a wezîrên hikumeta Tirkiye û yên Almanyayê ku wê hefteya pêşiya me li Berlînê pêk were, Merkel got ku ew ê li wir azadiya çapemeniyê û pirsgirêka kurd jî bikin rojevê. 

Serokwezîra Almanyayê Angela Merkel derbarê pirsgirêka kurd de wiha axivî: "Dema salên derbasbûyî  nîşaneyên erênî yên çareseriya pirsgirêka kurd hebûn, em gelekî kêfxweş dibûn. Em her dem û niha jî dibêjin divê pevçûn bi pîvan bin. Em ê di hevdîtina hefteya pêş de jî pirs bikin ka çi rê hene ku pêvajoya çareseriyê dîsa ji cihê mayî were domandin. Bêguman mafê Tirkiyeyê heye li dijî aktîvîteyên PKK‘ê yên terorîstî derkeve, lê divê mirov hay jê hebe ku şansê gelê kurd ê rasteqînî yê pêşveçûnê jî hebe û bi taybetî yê ciwanan."

Merkel li ser nêzîkbûna Yekîtiya Ewropayê û Tirkiyeyê jî destnîşan kir ku ji ber pêşveçûnên globalî ev têkilî gelekî girîng in. Bi taybetî jî babete penaberên Sûrî yên li Tirkiyeyê wekî mînak nîşan da. Derbarê endambûna Tirkiyeyê ya Yekîtiya Ewropayê de jî Merkel got ku ev yek wê rêyeke dirêj be.

Hêjayî gotinê ye ku ji ber hatina gelek penaberan a ji bo Almanyayê, Merkel digel bertekên heyî jî di pêvajoya hilbijartinê de çûbû Tirkiyeyê. Ev çûna wê wekî alîkariya Erdogan a hilbijartinê hatibû hesibandin û ji aliyê opozîsyon û çapemeniyê ve bi tundî hatibû rexnekirin. Her wiha ji ber tirsa pêşînegirtina penaberan a ber bi Ewropayê ve ji hêla Tirkiyeyê ve, Merkel bi wê yekê tê tawanbarkirin ku ew bûyê dîlê Erdogan û ji ber vê egerê xwe derbarê binpêkirinên mafên mirovan û êrîşên ser bajarên kurdan bêdeng dike.